Timmisartortitseqatigiiffiit mittarfimmut tunniussinermi nassatat oqimaappallaartillugit akiliisitsisarnerat assigalugu, Royal Arctic Line nassiussassatut inniminnikkat annertussusaat tunniunneqarnerini naapertuutinngikkaangata akiliisitsisalissaaq.

Umiarsuaatileqatigiiffik nittartakkamini taama ilisimatitsivoq.

- Nassiussassatut inniminnikkat annertussusaat tunniunneqarnerini naapertuuttannginnerat Royal Arctic Linemit ajoraluartumik nalaanneqartarpoq. Nassiussassat annertussusaat eqqortut inniminniinermi paasissutissiissutigineqarnissaat pingaaruteqarpoq.

Taamaanngippat aningaasaqarnikkut kinguneqartitsisoqassaaq, taama aarlerisaarisoqarpoq.

Saniatigut suliaqartitsillunilu inissamik atuinngitsoortitsisartoq

Royal Arctic Line juunip aallaqqaataani atuutilersumik inniminnikkamik allanngortitsisoqassatillugu palletsimut ataatsimut, collimut ataatsimut imaluunniit immikkoortumut ataatsimut 300 koruuninik allannguuteqartitsinermi akiliuteqartitsinissaminut pisinnaanngorneranik, tamanna pissuteqarpoq.

Royal Arctic Linep nalunaarutaa naapertorlugu, inniminnikkat tunniunneqarnerini annertussutsimikkut nikingassuteqartarnerat umiarsuup usissaanik pilersaarusiornermi allaffissornermilu naleqqutinngitsumik suliassaqarnerulersitsisarpoq.

Aamma umiarsuarni inissamik atuinngitsoortoqarneranik kinguneqaratarsinnaalluni, Royal Arctic Line allappoq, piujuartitsinissamik tunngaveqartumik assartuineq qulakkeerumallugu, aammalu nassiussassat umiarsuup aallarfissaanut kissaatigineqartumut usiliunneqarnissaat qulakkeerumallugu, siumut eqqortumik nalunaaruteqarnissaq inniminniinissarlu pingaaruteqartoq, ilanngullugu oqaatigineqarpoq.