RAL akit pillugit isornartorsiuinrmut akissuteqartoq
Royal Arctic Linep nassuerutigaa, Aalborgip, Aarhusip Reykjavikkillu akornanni assartukkat ilaannut akigitinneqartut assigiinngissuteqartut, Sulisitsisut isornartorsiuinerannut akissummi allassimavoq.
Aalborgimiit, Aarhusimiit Reykjavikimiillu Kalaallit Nunaannut assartuinermi containerinut nalinginnaasunut assigiinngissut 3 aamma 5 procentit akornanniissinnaavoq, aamma nassiussanut tamalaanut assigiinngissutaasoq 14%-iulluni.
Royal Arctic Line assartukkanut nillataartitanut qerisunullu assigiinngissuteqanngilluinnartoq oqaaseqartoq ilisimatitsivoq.
Isumaqatigiissummut pituttorsimasoq
Umiarsuaatileqatigiiffiup taamatut ilisimatitsissuteqarluni akigititat 110 prcentimik qaffassimanerangaanerat akerlilerpaa, Sulisitsisut pisortaata Christian Keldsenip pisiniarfiit soqutigisaqaqatigiiffiit sinnerlugit misissuisineranit innersuussutigalugu taamatut akisunerulertoqarsimaneranik ilisimatitsineranut akerliliilluni.
Royal Arctic Linelli Aalborg Havnimut isumaqatigiissummut, 2022-p naanerani aatsaat atorunnaartussamut pituttorsimanerani assartuisarneq Kalaallit Nunaanni suliffeqarfinnut akeqartussaavoq.
- Royal Arctic Line Aalborgimi umiarsualivimmut tunngatillugu aalajangersimasunik aningaasartuuteqartillugu akit Århusimi qaffasinnerulaartuassapput Århusimut immikkut tapiliussaqarnera pissutigalugu, Royal Arctic Linellu Danmarkimi umiarsualiviit marluk aqqusaartarunnaarpagit tapiliussaq taanna peerneqassaaq, Namminersorlutik Oqartussat umiarsuaatileqatigiiffiat ilisimatitsivoq.
Umiarsuaatileqatigiiffimmit oqaatigineqarpoq, nuussinernut piffissartornerup sivikinnerulernerata sapaatit akunnikkuutaartumillu aqqusaartoqartarnerata iluaqutissartai Sulisitsisunit immikkut erseqqissaatigineqanngitsut.
Akit apparneqarnissaannut pisariaqartoq
- Royal Arctic Line Islandip Nunattalu akornanni assartuinermut akinik appaasinnaassappat Skandinaviap Islandillu akornanni inissamik tunisaqarnissaq pisariaqarpoq, tamanna imarpikkoortaatit Skandinaviap Nunattalu akornanni angalatinneqarnerinut aningaasartuutinut piffissap ingerlanerani matussutigineqarsinnaassammat. Tamannalu maanna periarfissaalerpoq, umiarsualiviit Skandinaviap Islandillu akornanni angalanissamut niuernikkut tunngavissaqartut tikittaleratsigit, umiarsuaatileqatigiiffimmit ilisimatitsissutigineqarpoq.
Umiarsuaatileqatigiiffiup ilanngullugu oqaatigaa, uuliamut tapiliussamut uuliamik niuerfimmi akit apeqqutaajuaannartut, akillu allanngortinneqaraangata akit qaffallugilluunniit appartinneqartartut.