RAL akikilliliinissamut piareeqqavoq - KNI-milli inuussutissat akikinnerulersinneqarnissaannik suli pilersaaruteqartoqanngilaq

Royal Arctic Line Namminersorlutillu Oqartussat nunami maani assartuinermi uuliamut tapiliussap appartinneqarnissaanik isumaqatigiissuteqarsimapput. Isumaqatigiissutip atuisunut iluaqutaanissaa politikkikkut kissaataavoq, kissaatigineqartulli qanoq pivisunngortinneqarniarnera suli paasinarsinngillaq.

- Naalakkersuisut sinnerlugit oqaatigerusuppara, nioqqutissanik eqqussuisartut ulluinnarni inuussutissat akikinnerusunngortinneqarnerisigut akit apparneqarsimanerat atuisunut toqqaananrtumik iluaqutaalersitsinissaat naatsorsuutigalugu.

Aningaasaqarnermut Naligiissitaanermullu Naalakkersuisoq Naaja H. Nathanielsen taamatut oqarsimavoq.

Namminersorlutik Oqartussat Royal Arctic Linelu ukiup 2022-p sinnerani avannamut assartuinermi uuliamut tapiliusssap appartinneqarnissaa pillugu sapaatip-akunnerisa marluk matuma siornatigut isumaqatigiissuteqarput. Suliniutigineqartumi containerit nillataartitsivittut qerititsivittullu atorneqartartut siunnerfigineqarsimapput, taakkumi nerisassanik assartuinermut atorneqartarmata.

Sermitsiaq.AG-mit KNI-mut apeqqutigineqarsimavoq, uliamut aningaasallu nalinginut tapiliussap appartinneqarnera inuussutissat akii eqqarsaatigalugit atuisunut qanoq sunniuteqassanersoq, sulili tamanna akissuteqarfigineqarsimanngilaq. KNI-mit neriorsuisimapput, akit qanoq aaqqiiffigineqassanersut paasinarseriarpat akissuteqartoqarniartoq.

KNI suli pilersaarusiorsimanngitsoq

Isumaqatigiissut RAL-ip marlunngornermi nittartakkamigut saqqummiussimasaa, 2022-mi septembarip aallaqqaataaniit decembarip 31-ata tungaanut uuliamut aningaasallu nalinginut tapiliussap appartinneqarnissaanut attuumassuteqarpoq, taamalu sikusartumiittut ukiuunerani pilersorneqarnissaasa qulakkeerneqarnissaa immikkut eqqarsaatigineqarsimalluni.

Usit kiassutsimi aalajangersimasumiitinneqartussat usillu nalinginnaasut assigiinngitsunik isumagineqartussaapput. Akinut appaatigineqartut, soorlu kiassutsimi aalajangersimasuniitinneqartut 2022-mi septembarip aallaqqaataaniit atuutsinneqalerput, usinullu allanut tunngassuteqartut oktobarip aallaqqaataaniit atuutsinneqalerlutik.

Tapiliussalli appartinneqarnera atuisunut qanoq iluaqutaassanersoq saqqummiunneqanngilaq.

Powered by Labrador CMS