RAL ajorsarpoq: Pituffik pillugu isumaqatigiissut USA-mi umiarsuaatileqatigiiffimmut tunniunneqarpoq
Amerikami illersornissaqarfiup aalajangerpaa Danmarkip Pituffiullu akornanni usinik imaatigut assartuinermi sullissineq amerikamiut umiarsuaatileqatigiiffianut tunniunneqassasoq.
Royal Arctic Line usinik imaatigut assartuinissamut suliassamut amerikami illersornissaqarfimmut neqerooruteqaraluarami iluatsitsinngilaq. Amerikamiut aammaarlutik aalajangerpaat umiarsuaatileqatigiiffik amerikameersoq suliassamik tunineqassasoq.
Amerikamiut umiarsuaatileqatigiiffiat Schuyler Line Navigation Company LLC neqeroornermi ajugaatinneqarpoq. Umiarsuaatileqatigiiffik taanna siullermik maajimi 2017-imi suliassinneqaqqaarpoq.
- Uggornarluinnarpoq kiffartuussinissamut isumaqatigiissut kalaallit umiarsuaatileqatigiiffiannut tunniuteqqinneqarnissaat pisinnaasimanngimmat, Ilinniartitaanermut, Kultooreqarnermut, Ilageeqarnermut Nunanullu allanut tunngasunut Naalakkersuisoq, Ane Lone Bagger (S) tusagassiutinut nalunaarummi oqarpoq.
Royal Arctic Line siusinnerusukkut Danmarkimiit, Nuummut Pituffimmullu ukiumut marloariarluni pingasoriarluniluunniit usinik imaatigut assartuineq suliassatut tigummisimavaa. 2017-imili suliariumannittussarsiuussisoqareernerata kingorna RAL-ip isumaqatigiissutini amerikamiut umiarsuaatileqatigiiffiannut annaavaa.
Suliassamut neqeroortut pingasuusut
Royal Arctic Line nunanut allanut tunngasunut naalakkersuisoqarfimmut ilisimatitsivoq suliassamut isumaqatigiissuteqarnissamut neqeroorsimalluni. Umiarsuaatileqatigiiffilli suliariumannittussarsiuussinermi ajugaasimanngitsoq, naalakkersuisoqarfik ilisimatitsivoq.
Amerikamiut illersornissaqarfiata naalakkersuisoqarfik ilisimatippaa umiarsuaatileqatigiiffiit pingasut suliassamut isumaqatigiissuteqarnissamut neqeroorsimasut. Pituffimmi isumaqatigiissutit tigoqqinnissaannut Naalakkersuisut suliniarput.
- Naalakkersuisut danskit Nunanut Allanut Ministeriaqarfiat peqatigalugu amerikamiut nunatsinni sakkutooqarneranni kalaallinut pingaaruteqarnera pillugu USA-mut oqaloqatigiissutigineqaqqissaaq, Ane Lone Bagger allappoq.