Rådet for Grøn Omstilling: - Unioqqutitsinerunngilaq, kisianni pissuserissaarnikkut avatangiisinut pinerlunneruvoq

Aalajangersagaq avatangiisinut iluaqutaasussaq inatsimmut maanna ilanngunniarneqalerpoq. Avatangiisilli pimoorullugit illersorusukkaanni naammanngilaq. Danmarkimi Rådet for Grøn Omstilling taama isumaqarput.

- Avatangiisivut peqqissuserpullu mianerissallugit, Naalakkersuisunut pingaaruteqarpoq.

Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund, 2021-mi ukiakkut taama oqarpoq.

MARPOL-imi isumaqatigiissummi Ilassut VI-imut Kalaallit Nunaata naalagaaffigisap killeqarfigisaanut nangaassutiginerata atorunnaarsinnissaa akuerineqarmat taama oqaaseqarpoq. Umiarsuarnit silaannarmik mingutsitsinerup annikillisarneqarnissaanut siunnersuut tunngasoq, Inatsisartunit akuerineqarpoq.

Aalajangersagaq maanna nuna tamakkerlugu inatsimmut ilanngunneqalerpoq. Kisianni pinngortitaq peqqissuserlu pimoorullugit mianeriniaraanni suli iliuuseqarnerusoqartariaqarpoq.

Rådet for Grøn Omstilling (Danmarkimi mingutsitsinnginnerunissamut siunnersuisoqatigiit) taama naliliivoq.

- Kalaallit Nunaata ilanngunnera ajunngilluinnarpoq, kisianni aatsaat kiisami pivoq, Kåre Press-Kristensen, avatangiisinut illersuiniaqatigiiffimmi arlaannaanut attuumassuteqanngitsumi siunnersortaaneq oqarpoq.

Nunat inupiluuserniartartut

Kalaallit Nunaat MARPOL-imi isumaqatigiissummut 1997-imi ilannguppoq – Naalagaaffiit Peqatigiit nunani tamalaani imarsiornermut kattufiata, IMO, ataani. Kisianni Kalaallit Nunaat isumaqatigiissummi ilassut VI-mi umiarsuit silaannarmik mingutsitsinerannut tunngasumi maannamut nangaassuteqarsimavoq.

Naalagaaffiit avatangiisinut soqutiginninngitsut imaluunniit nunat peqqarniisaarniartartutut taaneqartartut isumaqatigiissummut naammassinninngillat, tassa nunat Kalaallit Nunaata nalinginnaasumut sanilliuttanngisai.

Kåre Press-Kristensenip oqarnera naapertorlugu, Kalaallit Nunaallu maanna suleqatigiinnut pitsaasunut ilannguppoq. Tamannali imminerminik allannguivallaanngilaq. Umiarsuarnit annertuumik mingutsitsisoqarneranik akiusoqartariaqarneranik siunertaqarneruvoq.

- Tassa taamatut siunertaqarnermik nalunaaruteqarneruvoq, ilanngunnermut innersuussilluni taama oqarpoq.

Assortuuttoq

Aappaatigut mingutsitsineq akiorniarlugulu, kisianni peqatigisaanik umiarsuarnik takornariartaatinit takornariartitsisarnissaq kissaatigigaanni, isummat assortuunnerannik ilaat isumaqarpata paasisinnaavara.

- Umiarsuit takornariartaatit annertuumik mingutsitsisarput. Kalaallit Nunaata umiarsuit takornariartaatit assersuutigalugu Nuummut tulakkaangata sarfamik isumaginnittarnissaa pingaaruteqarluinnarpoq, erngup nukinganik nukissiorfissuarmut innersuussilluni taama oqarpoq:

- Aningaasaliineq pitsaalluinnartuuvoq. Annertuvoq, kisianni aningaasaliissutit sukkasuumik utissapput, umiarsuit nunamit sarfamik pisisussanngussagamik. Taamatut aningaasarsiortoqartarpoq.

Nerisassat pinngortitarlu mingutsitaanngitsut

Siulleq taannaavoq. Aappaattut tassaassaaq, Kalaallit Nunaata, Namminersorlutik Oqartussat ilanngullugit - Kåre Press-Kristensenip oqarnera naapertorlugu – scrubberinik taaneqartartut, putsumik silaannarmut aniatitsinnginnermi svovlinik saliisartut, taarsiulluguli imaanut toqqaannartumik taakkuninnga aniatitsisartut inerteqqutaalersittariaqarpai.

Orsussanik mingutsitsinnginnerusunik amerlasuunik peqartoq, Kåre Press-Kristensen nassuiaavoq, taamaalilluni scrubberit pinngitsoorneqarsinnaallutik, kisianni assersuutigalugu Royal Arctic Line (RAL) orsussamik mingutsitsisumik scrubberinillu atuivoq, akikinnerunera pissutigalugu.

- Takornariartitsineq Kalaallit Nunaannut isertitaqarfiunerpaat ilagilertussaasoq qularinngilara. Kisianni pinngortitaq imaluunniit nerisassat minguitsut mingutsinnaveersaarneqassapput, taamaanngippat takornariat tikinnavianngillat, tamannalu tuniniaanermut sunniuteqarpoq, taanna nassuiaavoq, ilanngullugu ima oqarpoq:

- RAL-ip – umiarsuit allat scrubberinik atuisut allat assigalugit – immamut kueraasarnerat tusaraangamikku upperiuminaatsittarpaat. Unioqqutitsinerunngilaq, kisianni pissuserissaarnermut tunngatillugu avatangiisinut peqquserluttuliorneruvoq.

Isornartorsiuineq RAL-imut ingerlateqqinneqarpoq, taakkulu uterfiginninniarlutik neriorsuipput.

Powered by Labrador CMS