Raajat tunineqartut ikileriangaatsiartut
Ukioq manna januaarimi raajat tunineqartut 2018-imi qaammammut tassunga sanilliullugit ikileriarujussuarput.
Raajarniat ukiuni sisamani kingullerni ukioq manna januaarimi aatsaat taama ikitsigisunik tunisaqarput.
2018-imut sanilliullugu ukioq manna raajat tunineqartut 40 procentimik ikinnerupput. Tassa 3.899 tonsinit 2.328 tonsinut appariartoqarpoq, Naatsorsueqqissaartarfimmit kisitsisit nutaat tamanna takutippaat.
2018-imi januaarimi ukiut siuliinut sanilliullugu nalinginnaanngitsumik raajat amerlasuut tunineqarnerat, tassani oqaatigineqartariaqarpoq.
Raajaannaanngitsut
Raajat tunisat kisimik ikilerianngillat, ukiup siulianut sanilliullugu qaammat taanna qiviaraanni aamma qalerallit saarulliillu tunisat ikileriarput. Taamaattoq qalerallit tunineqartut januaarimi 2017-imit amerlanerupput.
Tassami 2019-imi januaarimi 1.605 tonsit qalerallit tunineqarput, ukiup siuliani 2017-imi 1.288 tonsiullutik.