Raajat tunineqartut aatsaat taama amerlatigisut
Raajarniarneq 2019-imi ingerlalluarsimasoq, Naatsorsueqqissaartarfimmit naatsorsukkanit nutaanit takutinneqarpoq
Raajat tunineqartartut ukiut kingulliit pingasut ingerlaneranni amerliartortuarsimapput, 2019-imilu 48.620 tonsiullutik, taakkua ukiup siulianit 2.000 tonsinik 2017-imillu 6.000 tonsinik amerlanerullutik.
Qalerallit
Tunisanik kisitsisit qimerlooraanni qaleralinniarneq aamma siuariartorpoq. 2019-imi qalerallit 33.000 tonsit tunineqarsimapput, taakkualu ukiut siuliinit marlunnit amerlanerullutik. Kisianni 2016-imi tunisaqarnerpaaffiusimasumut qalerallillu 35.000 tonsingajaat tunineqarfigisaannut, 1.500 tonsit missingi amigaataapput.
Saarulliit ernummatigineqartut
Tamatuma akerlianik saarulliit tunisaanerat isigissagaanni ernummateqarnissamut pissutissaqarpoq, saarulliit 2016-imit ukiut tamaasa ikiliartortuarsimammata.
Saarulliit 24.000 tonsit tunineqarsimapput, taakkualu ukiup siulianit 3.000 tonsinik ikinnerullutik, 2016-imi tunisaqarfiunerpaasumit 16.000 tonsinik ikinnerullutik.