Raajat saarulliillu nunatsinniit annissuunneqartut akitsuuserneqassanngikkallarput
Tuluit Nunaat EU-miit anippat, Kalaallit Nunaat raajanit saarullinnillu nunatsinneersunik Tuluit Nunaannut annissuinermut akitsuutinik akiliisassanngikkallarpoq.
Tuluit Nunaata naalakkersuisuisa pingasunngornermi marsip 13-anni nioqqutissat eqqussuunneqartut akitsuutigigallagassaasa allattorsimaffiat saqqummiuppaat, taannalu nioqqutissanut eqqussuussanut atuutissaaq, Tuluit Nunaat EU-mut Brexit pillugu isumaqatigiissuteqassanngippata.
Raajat saarulliillu Kalaallit Nunaanneersut No Deal Brexitimik taaneqartumi ilaatinneqanngillat, tamanna isumaqarpoq Tuluit Nunaata raajanik saarullinnillu tunisassianik Kalaallit Nunaanneersunik akitsuusersuinissaq pilersaarutiginngikkaat. Taamaalilluni Kalaallit Nunaata Tuluit Nunaannut ukiumut tunisartagai 700 milliuunit koruunit sinnerlugit annertutigisut allattugaatit atuutilerneranit ukioq siulleq akisunerulersitsisumik akitsuuserneqassanngillat.
Nunanut allanut tunngasunut naalakkersuisoqarfik tusagassiutinut nalunaarummi taama allappoq.
- Kalaallit Nunaata raajanik saarullinnillu tunisassiaasa Tuluit Nunaanni akitsuusersorneqarnissaannut ilaannginnera ineriartorneruvoq pitsaasoq, naak aalisakkanik tunisassianik allanik akitsuusersoneqartussanik peqartoq. Taamaalilluni ukiumi tulliuttumi Kalaallit Nunaata Tuluit Nunaannut tunisassiaasa maannakkutut unammilleqatigiinnermi ajornerusumut inissittussaanngitsut takuneqarsinnaavoq, akitsuutinimmi akitsorsaataasinnaasunik inissiisoqanngimmat, Ilinniartitaanermut, Kultooreqarnermut, Ilageeqarnermut Nunanullu allanut tunngasunut Naalakkersuisoq, Ane Lone Bagger (S), tusagassiutinut nalunaarummi oqarpoq.
Akitsuutit akinut akitsorsaataassapput
Aalisakkat Kalaallit Nunaanni tunisassiarineqartut Tuluit Nunaannut eqqunneqarnerminni akitsuuserneqartalissappata, tamanna tunisassiat nioqqutigineqarnerannut akisunerulersitsissaaq. Tamanna isumaqarpoq kalaallinit tunisassiarineqartut Tuluit Nunaanni niuernermi unammillernissamut killeqarnerulissasut.
Naalakkersuisoqarfik ilisimatitsivoq EU-p Tuluit Nunaatalu Brexitimut isumaqatigiissutissatut siunnersuutaat akuerineqassappat Kalaallit Nunaata aalisakkatigut nioqqutissiaasa 2020-p naanerata tungaanut akitsuusersorneqassanngitsut.
Siunissamilu eqqussuinermut akitsuuteqanngitsunik tunisassiorsinnaanissaq anguniarlugu Naalakkersuisut Tuluit Nunaannut suleqatigiissuteqarniarniarput.
Naalakkersuisoqarfik tusagassiutinut nalunaarummini allappoq, Tuluit Nunaata Kalaallit Nunaatalu niuernikkut ataavartumik isumaqatigiissuteqarnissaq anguniarlugu Naalakkersuisut sulinertik ingerlatiinnassagaat, naak piffissami siullermi Kalaallit Nunaata Tuluit Nunaannut tunisassianut akitsuusersuinnginnissaq siunniussaagaluartoq.
- Tuluit Nunaata Kalaallit Nunaatalu niuernikkut ataavartumik isumaqatigiissuteqarnissaq anguniarlugu Naalakkersuisut sulinertik ingerlatiinnassavaat, taamaalillunilu Kalaallit Nunaata Tuluit Nunaannut attaveqaqatigiinnerat, Ane Lone Bagger (S) tusagassiutinut nalunaarummi oqarpoq.