Raajat akiisa appariarnerat inuiaqatigiinnut akisuvoq
2021-mut aningaasanut inatsimmi quppernerpassualimmi nunatta karsiata raajarniarnermit avaleraasartoorniarnermillu isertitat appariarujussuarneranik malugisaqarnissaa qulaarneqarpoq.
Aningaasanut inatsisissap pingajussaaneerneqarneranut atatillugu ukiunut tulliuttunut isertitassanik aningaasartuutissanillu nalilersuinerit arlalissuit iluarsiivigineqarput.
Aviisi Sermitsiaq allappoq.
Aningaasaqarnermut naalakkersuisoqarfimmi kisitsisilerituut ukiariartulernerani aningaasanut inatsisissamut missingiut siulleq saqqummiummassuk naliliisoqarpoq, raajarniarnermi isertitat appariarnerat 2020-mi isertitanik missingiinermut sanilliullugu 7,1 procentimik annikillisinneqassasut, tamannalu nunatta karsiata isertitaasa 20 millioner koruuninik appariaateqarnissaasa taamaaqatigaat.
Taamaakkaluartoq nunatta karsianut pissutsit suli ajorseriarnerujussuussasut, Aningaasaqarnermut Naalakkersuisoqarfik eqqoriaavoq.
Pissutaasoq
Raajat akiisa appariarsimanerannut coronamik nappaalaanersuaq nassuiaatigineqarpoq, tamanna nunarsuaq tamakkerlugu ilaatigut neriniartarfinnut eqquisimamma nunarsuarmi upernaaq matooraasoqarnera pissutigalugu, tuniluuttoqarsinnaaneranik aarlerinartorsiorneq annikillisinniarlugu inuit akornanni naapisimaqatigiittarneq killilersorneqalermat. Taamaalilluni aalisarnermik inuussutissarsiuteqartut tuniniaavimmik pingaarutilimmik annaasaqarput, tamannalu nunarsuaq tamakkerlugu akit apparnerannik pilersitsilluni.
Aningaasaqarnermut naalakkersuisoqarfik 2021-mi raajanit isertitassanik missingiinerminik novembarimi allanngortitsisariaqalerpoq, naak raajartassiissutit 115.000 tonsinik maanna amerlassuseqalersillugit 10.000 tonsinik qaffanneqaraluartut.
Ukioq manna siusinnerusukkut isertitat appariaatissaat 7,1 procentiusussatut missingerneqaraluartoq ullumikkut missingiinermi 19,2 procentinik appariaateqarnissaa ilimatsaanneqarpoq, tamatumalu missingiinernut 2020-mut aningaasanut inatsisissamut tunngavigineqartunut sanilliullugu isertitatigut ukiuni tulliuttuni marlunni 60 millioner koruuningajannik annaasaqarfiunissaa taamaaqatigaa. Pisassiissutinik qaffaanerup akit appariaataat iluaquseqqajarnavianngikkaa, maluginiarneqarpoq.
Allaaserineqartoq aviisimi Sermitsiami tamakkiisumik pisiarineqarsinnaavoq. Aviisi uani pisiariuk: