ikuallattoq
Qullissani ikuallattoq: Inuk ataaseq toqusimassangatinneqarpoq
Qullissani illoqarfimmi aamarsuarsiorfiusimasumi ikuallattoqarnera inuup ataatsip inuuneranik naleqartitsisimassangatinneqarpoq. Ilulissani politiit Danmarkimit misissuisartunik aggertitsipput, ikuallattumullu suna pissutaanersoq misissuileruttorput.
Illoqarfimmi aamarsuarsiorfiusimasumi Qullissani sapaammi ullaakku illu ikuallappoq, inullu ataaseq ikuallagussaalluni ajunaarsimassangatinneqarpoq.
Ilulissat politiivini pisortap, Sebastian Bechip tamanna uppernarsarpaa, Danmarkimiillu misissuisartunik aggersaasoqartoq aamma oqaluttuaraa.
- Inuup ataatsip ikuallagussaasimanissaa ilimagaarput, kisianni suli misissuisoqarpoq. Misissuisartut pingasut Danmarkimit aggersarpagut, taakku pingasunngorpat tikissangatinneqarput, Sebastian Bech Sermitsiaq.AG-mut oqarpq.
Sakkortuumik kiassarneq mianersuunneqartariaqartoq
Politiit sulinerat innuttaasut ataqqillugu ajutoorfik qanillissanngikkaat taassuma kajumissaarutigaa.
Illu sivisuumik qimaqqasimatillugu sakkortuumik kiassartarneq innuttaasut mianersuuttarnissaannut Sebastian Bech aamma kajumissaarivoq.
- Illu sivisuumik qimaqqasimagaanni, pujoorfiup milinnganninnera assigisaalu qulakkeeqqaarlugit kissarsuut sakkortuumik ikumatinnissaa mianersuunneqartarnissaanut kajumissaarusuppunga. Qatserutillu eqqortut piginissaat qulakkeerneqartariaqartoq, taamaalilluni ajutoornerit taamaattut siunissami pinngitsoorneqarniassammata, Sebastian Bech oqarpoq.
Ajunaarsimassangatinneqartup ilaqutai ilisimatinneqareerput.