Qulliit qamittoornerinut pissutaasoq paasineqartoq
Illoqarfiit pingaarnersaata innaallagiamik pilersorneqarunnaarneranut pissutaasoq maanna paasineqarsimalerpoq. Aatsaalli ullualuit sapaatit akunnialuilluunniit qaangiuppata pissutsit nalinginnaasunngoqqikkumaartut, Nukissiorfimmi pisortaq oqarpoq.
Nuummi ulluni kingullerni pisoqarujussuartaarneranut pissutaasoq maanna paasineqarpoq.
Tassa innaallagiap aqqutaanut kabelit najummisui kaanngariartulersimapput, taakkulu ingutsernerisa kinguneranik kabelit imminnut attuussinnaasimapput, taamaasilluni Nuuk ataasinngornerup unnukkuani innaallagiamik pilersorneqarunnaarluni.
Nukissiorfiit ajoqutaasoq sumiiffissarsivaat, kabelillu maanna taarsersorsinnaalerlugit.
Nukissiorfimmi nukissiornermut pisortaq, Kaspar Mondrup sisamanngornermi tusagassiortunik katersortitsinermi taama oqarpoq.
- Kabelit taarsersorneqartussanngortut nunamiipput, atortullu pigineqareerlutik. Aaqqiissuteqarnerli annertuvoq, taamaammat suliaqarneq ullualunnik sapaatit akunnialunnilluunniit sivisussuseqarsinnaavoq, Utoqqarmiut Kangerluarsunnguinit pilersorneqalernissatta tungaanut, Kaspar Mondrup ilisimatitsivoq.
Kabelit suliarineqartussanngortut erngup nukiganik innaallagissiorfimmmit 30 kilometerisut ungasissusilimmiipput.
Kabelit nakkutigineqarnerulersinnaapput
Nukissiorfiit Utoqqarmiut Kangerluarsunnguaniit Nuup tungaanut innaallagiamik pilersuinermut attaviit 56 kilometerisut takissuseqartut ukiumut marloriarlutik misissortarpaat.
Kaspar Mondrupip erseqqissarpaa suliffeqarfiup maanna nalilersussagaa sumiiffinni anorersuarujussuarnit sunnerneqarfiusuni misissuinerit amerlanerulersinneqassanersut.
- Imaassinnaasoq sumiiffimmi misissuinerit amerlanerusariaqartut. Maanna ilisimalerparput sumiiffimmi pineqartumi attaviit qajannarnerusumik inissisimasut, imaassinnaavoq taakku misissorneqarnerusalissasut. Oqartariaqarpungali uku paasisat uannut aamma nutaarluinnaapput, taamaammat suleqatikka oqaloqatigeqqaartussaavakka, Kaspar Mondrup Sermitsiaq.AG-mut oqarpoq.
Aningaasaliinerusoqassaaq
Nukissiornermut pisortaq oqaluttuarpoq Nuummi innuttaasut innaallagiamik atuinerminnik suli sipaartariaqartut. Nuuk innaallagiamik pilersuigallartussamit maanna pilersorneqarpoq, illoqarfiullu 90-95 procentia maanna pilersorneqarluni. Qamittoortoqartarsinnaanera suli naatsorsuutigineqassaaq, taamaattumillu innaallagialersuigallartoq atorluarumallugu angerlarsimaffinni sipaartoqartariaqarpoq.
- Innuttaasut suli innaallagiamik sipaartariaqarput. Ajornanngippat errorsinissat kinguartissigit, juullerpaluttut qulliit ulloriallu qaminngatissigit, inillu atorneqanngitsut kiassarneri sakkukillillugit. Innaallagiamik pilersuigallarnitsinni sipaartoqarsinnaappat, juullimut tamakkiisumik innaallagiamik pilersuinissaq uagut qulakkiissavarput, Kaspar Mondrup Sermitsiaq.AG-mut oqarpoq.
Politiit, Tusass, Nukissiorfiit Kommuneqarfik Sermersoorlu Nuummi upalungaarsimanermik suliaqarput. Nuummilu innaallagiamik pilersuinerup ajalusooqqinnginnissaanut innaallagiamik pilersuigallarfiusoq annertusarneqartariaqarpoq:
- Innaallagiamik pilersuigallarfiup annertusarnissaanut pilersaaruteqareerpugut. Qulakkeerneqarsinnaanngilaq qamittuunngiivinnissaq, pinartoqartilluguli pilertortumik pilersuisoqarallalersinnaanera anguniarneqarsinnaavoq. Annertusaanermi pilertortumik innaallagiamik pilersuigallartoqalersinnaanera angusinnaavarput, Kaspar Mondrup oqarpoq.
Taassuma erseqqissarpaa minguitsumik nukissiuuteqarneq suli anguniagaasoq, pinartoqalinnginnissaanulli Nuummi pilersuigallartussamik qulakkeerisoqassasoq.