Qullersat tamarmik arnaasut
Naligiissitaanissaq suli anguneqanngilaq. Maannali atorfinnut toqqaasaqattaarnerit sumut ingerlasoqarnera erseqqissarpaat – arnat amerlanerusut qullersanngortut. Nuummi suliffeqarfimmi aalajangersimasumi tamanna takulertornarneruvoq. Tassanimi qullersat maanna arnaannaapput.
Angutit atorfinni pingaarnerpaani kisermaassisuunerat arnanit sukkasuumik unammillerneqaleriartuinnarpoq. Taama ineriartortoqarnera piffissami sivisuumi atuutereerpoq. Piffissalli ilaanni – soorlu massakkut inissisimaffigisatsinni – atorfiit qulliunerpaat pineqartillugit Nunarput nunanut allarpassuarnut naleqqiulluni qanoq siuarsimanerutiginera erseqqilluinnarpoq. Aviisi AG allappoq.
Nunarsuarmi nunat amerlanngitsuinnaat – immaqa Norge kisimi – soorlu naalakkersuisuni arnat angutillu agguataarsimanerannik Nunatsinnut unammillersinnaavoq.
Naalakkersuisunut ilaasortat affaat arnaapput.
Allani pingaaruteqartuni arnat aamma sunniuteqaleraluttuinnarput imaluunniit qangali angutit qaangereersimallugit.
Sapaatip akunnerani 12-imi aamma 13-imi aamma pingaarutilinnik toqqaasoqarneratigut arnat nukittunerusumik inissisimajartornerat takussutissaqarpoq:
Dorthe Olsen aviisimi Sermitsiami akisussaasutut aaqqissuisuuninngussaaq, arnani siullersaalluni taama atuuffeqalissalluni. Maajip aallaqqaataanni taama atorfeqalissaaq. Aamma tusagassiivimmi tassani nittartakkakkut aviisi, naqitigassanik ilusilersuisarfik aamma allaffeqarfik arnanik qullersaqareerput.
Ullut arlaqanngitsut qaangiuttut aamma saqqummiunneqarpoq, Nukissiorfiit arnamik pisortartaassasut, tassaasumik Cicilie Senderovitz, taannalu aamma tassaalluni nukissiuuteqarfimmi allaffeqarfimmi arnani siullersaalluni taama atorfeqalersoq. Tassami teknikimut tunngasut GTO-qarallarmalli annerusumik angutinit isumagineqartuaannarsimammata.
Tamarmik arnaasut
Suliffeqarfimmi ataatsimi ineriartorneq tamanna erseqqilluinnarpoq. Nunatta Universitetiani, Ilisimatusarfimmi. Tassanimi aqutsisut maanna arnaannaapput:
Rektori, Ilisimatusarfimmi qullersaq aamma institutini aqutsisut sisamaasut. Kingullertut pinerluttunik ilisimatusarnermi siuttuusoq aamma pineqaatissinneqarsimasunut inissiisarfimmi pisortaq, Annemette Nyborg Lauritzen, qullersani suleqatigiinni savituuni ilaalersussatut toqqarneqarpoq.
Pissutsilli taamaanneranni apeqqutaalerpoq, killormut pisoqarsimagaluarpat, tassa angutaannaat taama inissisimagaluarpata - qanoq qisuariartoqarsimassagaluarnersoq?
Allaaserisaq tamaat uani AG-mi pisiarisinnaasanni atuaruk: