Qulinik ukiulik arpatitsinermi inersimasunut ajugaasoq

Arpatitsineq, Tour De Uummannaq sapaatip akunnera ingerlanneqareerluni naammassineqaqqammerpoq. Tassanilu inersimasunut ajugaavoq qulinik ukiulik, Felix Amondsen Nielsen.

Ane Mette Nielsen
Ane Mette Nielsen
Ane Mette Nielsen

- Felix apuuffissamut apuutilerluni tanngassimaartorujussuuvoq nuannaarlunilu. Paasigamiuk ajugaasinnaalluni assut pissangasaqattaarnikuuvoq, arnaa Ane Mette Nielsen Sermitsiaq.AG-imut oqaluttuarpoq.

Tour De Uummannaq oktobarip 25-ani aallartinneqarpoq sapaatip akunneranillu sivisussuseqarluni. Arpatitsinermi arpaffissat assigiinngiiaarput. Felix Amondsen Nielsen ajugaavoq, naak ulloq ataaseq napparsimanini pillugu arpaqataasinnaasimanngikkaluarluni.

- Pointinik amerlanerpaanik katersisinnaasimavoq ullut tamangajaasa takkuttarami. Timersornermi annertuumik piumassuseqartuaannarnikuuvoq. Soorlu kilometererpassuarnik arpariarluni arsariarsinnaavoq allamilluunniit timersuumik aallussiartorluni, Ane Mette Nielsen oqarpoq.

- Takkuttuarnera ajugaanermik akilerneqarpoq, ajugaasup arnaa naqissusiivoq.

Felix katillugit 27, 51 kilometerit ulluni arfinilinni agguarlugit arpappai. Tour De Uummannami arpanneq katillugu 32,20 kilometeriuvoq.

Neriuffimmik aningaasanik katersineq

Qulinik ukiulik, Felix siullermeerluni arpanngilaq. Oktobarip aallartinnerani Neriuffimmut aningaasanik katersuisoqarmat aningaasanik katerseqataavoq.

- Neriuffimmut 2.250 koruunit katillugit katersorpai. Siullermik 10 kilometerit arpassallugit aalajangerpoq, aningaasallu tunniunneqartut amerliartortillugit 15 kilometerinik takissusilimmi arpanniarluni aalajangerpoq. Kisianni ullup ataatsip ingerlanerani 27 kilometerit arpappai, marathonerujusukkaluarluni, arnaa oqaluttuarpoq.

Felix Amondsen Nielsen ilaquttani Uummannami najugaqatigai. Pingasunillu ukioqarluni angajoqqaani peqatigalugit arpattalerluni.

Felix gavekortinnappoq, imerfiit marluk Tusass-erlu Rema-meersoq. Ilaqutariit ataatsimoorlutik illinnartunik nerisaqarlutik ulloq naggaserpaat.

- Anaanaga igasimariarami uangalu kaagiliornikuullunga. Ikinngutigut ilaquttagullu ataatsimuulaarpugut ajugaanera malunnartilaarlugu, Ane Mette Nielsen oqaluttuarpoq.

Powered by Labrador CMS