Qulingiluat tunillatsissimapput - inuiaqatigiinni tuniluuttoqarpoq
Sisimiuni tunillatsissimasut nutaat sisamat aamma Nuummi tallimat paasineqarput.
Ulloq unnuarlu ataaseq kingulliup ingerlanerani tunillatsissimasut qulingiluat paasineqarput. Tunillatsissimasut ulluni kingullerni amerlanerulaarput, ullut kingulliimmi tunillatsissimasut arfineq-marluunngikkuni arfineq-pingasuusaramik.
Nunatta nakorsaaneqarfiata ilisimatitsissutigaa Sisimiuni sisamat Nuummilu tallimat paasineqarsimasut. Tunillatsissimasinnaanermut misissortittut katillugit 468-iupput.
- Tunillatsissimasut qanigisaannik misissuinermit paasinarsivoq Sisimiuni aamma Nuummi inuiaqatigiit akornanni tunillaassuuttoqartoq. Illoqarfinni taaneqartuni innuttaasut tunillatsissimasinnaanermut ersiutinik maluginiarluarnissaat kaammattuutigineqarpoq, tunillatsissimasinnaanermullu ersiuteqarnermi misissortinnissaq kaammattuutigineqarluni, nunatta nakorsaaneqarfia allappoq.
Peqqissisimasut arlaqarput. Nunatsinnilu tunillatseqqasut amerlassusaat ippassartut iinnarput. Qeqqata Kommuniani aqqaneq-marluk aamma Kommuneqarfik Sermersuumi 24-it tunillatseqqasutut nalunaarsorneqarsimapput.
