Qulimiguullit nutaat inissaqartariaqarput
Ilaasunik angallassisarneq qulimiguullit nutaat atorlugit pitsaanerulersinneqassaaq, Naalakkersuisut taamaammat Upernavimmi, Qaanaami Tasiilamilu qulimiguullit inissaannik sanaartortitserusupput.
Naalakkersuisut, Inatsisartut Aningaasaqarnermut Akileraartarnermullu Ataatsimiititaliaannut inassuteqarnermikkut qinnutigisimavaat, Upernavimmi qulimiguulimmut inissamik nutaamik piaarnerpaamik sanaartornissamut atugassanik 18,1 millioner koruuninik atuinissaq.
Peqatigitillugu Naalakkersuisunit ilisimasaarutigineqarpoq, Tasiilami Qaanaamilu qulimiguullit inissaannik 2021-mi sanaartortoqartariaqartoq.
Tamanna pappialani Aningaasaqarnermut Akileraartarnermullu Ataatsimiititaliap tamanut saqqummiussaanni takuneqarsinnaavoq.
Pitsaanerusumik assartuisinnaanermut pisariaqartoq
Taamaalilluni Kalaallit Nunaata avannaani angallassisarneq ukiortaamiit pitsaanerulersinneqarniarpasippoq. Avannaani ilaasuinik angallassisarneq ilaatigut patajaanngippallaarnerarneqarlugut isornartorsiorneqartarpoq.
- Avannaani qulimiguullit nutaanik inissaqartinneqalernerat, Avannaani qulimiguullitnutaat atorlugit ilaasunik angallassisarneq pitsaanerulersinneqassaaq, pappialani allassimavoq.
Pappialat naapertorlugit, Air Greenlandip qulimiguullit Bell 212-it qulimiguulinnik Airbus H155-inik taarserniarlugit eqqarsaatigai.
Upernavimmi qulimiguullitinissaannut tunngatillugu Naalakkersuisunit neriuutigineqarpoq, sanaartorneq 2021-mi januaarip allaqqaataani naammassineqarsimassasoq. Qulimiguullit inaanni, qulimiguuliup H155-ip sanitigut, Air Greenlandip qulimiguuliutai nutaat, ujaasinermut annaassiniarnermullu atorneqartartut inissaqartinneqassapput.
Isumannaallisaanermut annertusaaqataassasut
- Sulinut taamaalilluni aqqutigalugu Avannaani innuttaasut isumannaannerusumik isumagineqartalissapput, pappialani allassimavoq.
Aningaasat Naalakkersuisut ataatsimiititaliamut qinnutigisaat, Sanaartugassanut Aningaasaliissuteqarnissamullu Aningaasaateqarfimmit immikkoortitanit, 500 millioner koruunit sinnerlugit nalilinnit, taamaatiinnarneqarsimasunit kinguartinneqarsimasunilluunniit aaneqarsimapput.
Tasiilami Qaanaamilu qulimiguulinnu inissanik sanaartornissamut aningaasaliissutissat, aningaasanut inatsisissap isumaqatiginniunniutigineqarneranut ilaatinneqassapput.