Qulimiguulliit nutaat silap ajorneranit aamma unammillerneqartassapput
Qulimiguullit pisiarineqaqqammersut H155-it, sumiiffiit ilaanni silap qanoq issusaanit aamma unammillerneqartassapput. Taamaasilluni avannaani sila pissutigalugu kinguaattoornerit pitsanngornavianngillat.
Partii Naleqqamit Pele Broberg qulimiguulik H155 Bell212-imik taarsiisussaq assersuutigalugu Upernaviup eqqaani sila pissutigalugu kinguaattoortarnernut pitsanngorsaataassanersoq pillugu paragraf 37 atorlugu arlalinnik apeqquteqarsimavoq.
Sumiiffiit ilaanni silap qanoq innera pissutigalugu angallannerup kipiluttunarsinnaaneranut qanoq iluaqutaassanersoq takujuminaassorinarsinnaavoq, Naalakkersuisoq Karl-Frederik Danielsenip akissutaa atuaraanni. Naalakkersuisoq akiniarnermini Air Greenlandimit paasissutissanik ikiorneqarsimavoq.
Apeqqummi qulimiguullit nutaat "angallassinikkut unamminartutut atuuttut eqqarsaatigalugit ikiuutaasinnaanersut”, akissut imaappoq:
- Naagga, sullissinerit amerlanersaat aamma siunissami VFR-imut aalajangersakkat malillugit, taamaalillunilu maanna sullissisarnermi killilersuinerit assingi atorlugit ingerlanneqartartussaapput, akissummi Air Greenlandip suliarisimasaani allassimavoq.
Ilanngullugu ilisimatitsissutigineqarpoq qulimiguulik H155 VFR-imut aalajangersakkat aamma IFR-imut aalajangersakkat atorlugit angallassisinnaasoq.
Kullorsuarmi allannguuteqassanngilaq
Ilanngullugu nassuiaatigineqarpoq Kullorsuarmi angallassinikkut unammillernartuusinnaasut allannguuteqarnavianngitsut, Kullorsuarmi angallassineq IFR-imut aalajangersakkat atorneqanngimmata.
- Kullorsuaq ornigassatut IFR atorlugu timmisartuussivigineqarnissamut akuerisaanngilaq, taamaattumillu H155 timmisartuussinermini VFR-imut aalajangersakkat malillugit B212-imut killilersuutit assinginik atuilluni timmisartuussisartussaassaaq. Taamaattumik akissut naaggaavoq, akissutigineqarpoq.
Paragraf 37 atorlugu akissutini nassuiarneqarpoq qulimiguulik H155 sukkanerusumik angallassisinnaasoq "sukkanerusumik isorartunerusumullu timmisartuussisinnaagami".
Qulimiguullit nutaat Upernaviup eqqaani 2021-imi ukiup affaani kingullermi atulertussat sumiiffimmi angallannerup pitsaanerulernissaanik isumalluartitsilersimagaluarput.
Angalasup, ullut 25-it sinnerlugit kinguaattooqattaarnermik misigisaqarsimasup, neriuuteqarneq Sermitsiaq.AG-mut oqaluttuarigaluarpaa.