Qulimiguulimmut immikkut inuttaliisoqarpoq
Upernavimmi innuttaasut nuannaarutigisinnaasaannik, Naalakkersuisut aalajangerput qulimiguulimmut inuttaasunullu sumiiffimmi immikkut angallassisussanut aningaasaliissallutik.
Januaarimiit martsi 2019 ilanngullugu Upernavimmi qulimiguulimmik allamik angallassisoqarsinnaanera Naalakkersuisut akuersissutigaat. Taamaaliortoqartinnaguli inuttassat amerlinissaat pillugu Air Greenlandimut isumaqatiginninniartoqaqqaartariaqarpoq.
Kujataani angallanniarnermi ajornartorsiuteqarneq qaangerniarlugu Naalakkersuisut decembarimi qulimiguulimmik angallassisussamik immikkut akuersissuteqarput.
Upernavimmilu “sumiiffimmi qulimiguulimmik angallassinerup patajaallisarnissaanut” atugassammik immikkut inissiisoqartoq, Naalakkersuisut nittartakkaminni allaaseraat.
Angallassisussanik immikkut inuttaliisoqarnissaq 1,29 milliuunit koruuninik naleqassaaq. Aningaasat aningaasanut inatsimmi, kontomi suliniutinut nutaanut sillimmatiniittut atorneqassapput.
Akuersinissaq aningaasaqarnermut ataatsimiititaliamut piaartumik suliassanngorlugu ingerlateqqinneqassaaq, taakkulu immikkut inuttaliisoqarnissaa akuerissavaat.