Qulimiguulimmik assartuisarneq annikillisinneqartoq: Aallarnerit tamaasa ilaasut pingasut
Uummannap nunaqarfiisalu akornanni qulimiguulimmik angallassisarneq sapaatip-akunneranut ataasiaannarluni pisalissaaq. Ilaasut ikippallaartarnerat pissutigalugu taamatut allannguisoqarsimasoq, Naalakkersuisut ilisimatitsipput.
Uummannami eqqaanilu qulimiguulimmik angallassisarneq ajornerulersimasoq, Siumumi politkkeri Jens Kristian Therkelsen isumaqarpoq.
Taassuma ajornartorsiut qanoq iliuuseqarfigineqarniarnersoq Naalakkersuisunut apeqqutigisimavaa.
- Ukioq mannamiit Uummannap nunaqarfiisalu akornanni sapaatip-akunneranut ataasiannarluni qulimiguulimmik angallassisoqartalerpoq. Tamanna angalasunut illoqarfimmi unnuisariaqartartunut annertuumik kingunerluppoq. Silap ukiullu qanoq ilinera apeqqutaatillugit inuussutissarsiuteqartunut tmanna kingunerluuteqangaatsiarpoq, Therkelsen Naalakkersuisunut allappoq.
Attaveqaasersuutinut Naalakkersuisup Erik Jensenip (S) akissuteqarnermini nassuiaatigaa, qulimiguulimmik angallassisarneq bilitsisisartunut pitsaanerusumik naapertuutsilerniarlugu annikillisinneqarsimasoq.
Aallarfissat taamaatiinnarneqarsimasut
Air Greenlandi naapertorlugu, Uumannamiit Ikerasannut angallassisarnermi agguaqatigiissillugit pingasut ilaasarsimapput, Jensen ilisimatitsivoqm, nangillunilu:
- Air Greenlandimit aamma ilisimatitsissutigineqarpoq, kiffartuussinissamik isumaqatigiissutaasimasoq malillugu Uummannap nunaqarfiisalu, taakkununnga ilanngullugu Ikerasaap akornanni sapaatip-akunneranut marloriarluni angallassisarnissamik pilersaaruteqarneq eqqortuusoq. Taamalilluni sapaatip-akunnera ataatsimi aallarlunilu angerlartoqarsinnaasarniassammat.
- Nalinginnaasuuvoq ilaasussaqartannginneq pissutigalugu aallarfissap ullumik-ataatsimik sioqqullugu taamaatiinnarneqartarnera, Erik Jensen akissuteqaammini allappoq.
Naalakkersuisut qulimiguulimmik maanna taamatut atuisoqarneranut isumaqataapput, Erik Jensen kiffartuussinissamik isumaqatigiissutit pitsaanerulersinneqarnissaannut aingaasanik nassaartoqarnissaa kissaatigineqarpat susassaqartunik oqaloqateqarnissamut Naalakkersuisut piareersimasut erseqqissaasoq oqarpoq.