Qulimiguulik H155 siulleq nunatsinnukaanneqarpoq
Qulimiguullit H155-it arfiniliusuni siulleq nunatsinnut sapaatip akunnera una tikiunneqassaaq. Qulimiguullit H155-it Bell212-inut paarlaassisussaapput.
H155 qulimiguullit arfiniliusut, Avannaani, Kujataani Tunumilu Air Greenland sinnerlugu timmisartuussilertussaasut arfiniliusut siullersaat nunatsinnut sapaatip akunnera una tikiunneqartussanngorpoq. Nuummut tikereersimaleruni Upernavimmut angalassaaq, Upernaviullu eqqaanilu angallassilissalluni.
Air Greenland taama nalunaaruteqarpoq.
- Qulimiguulinnik nutaanik atuilernissaq siorna novembarimi Namminersorlutik Oqartussanut kiffartuussinissamut isumaqatigiissutissat nutaat isumaqatigiissutigineqarnerinut atatillugu piviusunngorpoq. Tassani oqaluttuarisaanermi aatsaat taama sivisutigisumik ukiuni qulini atuuttussamik isumaqatigiissusiortoqarpoq, taamaalillunilu aamma aningaasaqarnikkut sinaakkutissat, kinguaariinni tullernut nikinnissamut periarfissiisut qulakkeerneqarput, Air Greenland allappoq.
- Maanna ataqqinnilluta Bell212-it tatiginarlutik sulipiloortut inuulluaqquneqarnerat aamma qulimiguulinnit H155-init nutaaliaasunit siulliup tikilluaqquneqarnera oqaluttuarisaanermi pisuuvoq pingaarutilik. Taakku atorlugit nunatta Kitaani Tunumilu nunaqarfinnut minnerusunut amerlasuunut sukkanerusumik timmisartuussisoqartalissaaq atuisunullu pitsaanerusunik misigisaqartitsisalissallutik, Air Greenlandimi pisortaaneq Jacob
Nitter Sørensen oqarpoq.
Bell212 angallassiunnaassaaq
Qulimiguullit Bell212-it nunatsinni 1970-ikkunnili timmisartuussilersimapput. Qulimiguullinilli nutaanerusunik taarserneqartussanngorput.
Air Greenland ilisimatitsivoq Bell212 kingulleq 2022-mi naggataamik angallassiumaartoq.
- Sulisut arlallit qulimiguullit nutaat atulernissaat anguniarlugu ulaperujussuarsimapput, aammalu tulluusimaarutigaara pilotigut mekanikerivullu maanna Air Greenlandip timmisartuisa assigiinngiiaartut ilassutissaannik isumaginnissinnaanissamut ilinniarsimalersimammata. Taamatorpiaq iliornitsigut ataatsimoorluta nunatsinni attaveqaatit ukiorpassuarnut tulliuttunut qulakkeertussaavarput, Jacob Nitter Sørensen oqarpoq.
Covid-19 pissutigalugu qulimiguullip H155-ip nunatsinnut tikinnera malunnartinniarlugu Air Greenland nalliuttorsiortitsissanani aalajangersimavoq.