Qulimiguulik ajutoortoq: Timmisartortartup annertuumik ajutoornissaq pinngitsoortippaa
Air Greenlandip qulimiguuliutaani timmisartortartup assartuilluni milernermini erseqqarlunnera pissutigalugu sumiinnerminik takunnissinnaajunnaarsimavoq. Timmisartortartup sukkasuumik qisuariarnerani inuit nunamiittut eqqorneqannginnerat pissutaasorinerarneqarpoq.
Qulimiguulik assartuilluni Qaqqatoqqami (Itillip eqqaani) ajutoortoq pillugu Air Greenland paasissutissanik amerlanerusunik maanna saqqummiussaqarpoq.
Timmisartortoq qulimiguulimmi kisimiippoq, taannalu ajoqusinngilaq. Inuillu aamma nunamiittut ajunngillat.
Ajutoorneq, qulimiguullip taamaallaat aserorneranik kinguneqartoq pillugu, Air Greenland ima allappoq:
Erseqqarluttoq
- Misissueqqaarnerup ilimanarsitippaa qulimiguulik assartuitilluni qaqqap qaani erseqqarlusseriataarnera pissutigalugu aquttua sumiiffeeruttuullatsiarsimavoq. Nunami sulisut ajoquserniarnagit aquttup qulimiguulik piffimmiik nigortertittariaqarsimavaa, sakkortuumik minnermik kinguneqartumik, Air Greenland tusagassiuutinut nalunaarummi taama allappoq.
Timmisartortartoq inuillu nunamiittut ajutoornermut takunnittut ajunngitsut aamma ikiorserneqarnissamik neqeroorfigineqarsimasut ilisimatitsissutigineqarpoq.
- Teknikkikkut ajoquteqarneranik takussutissaqanngilaq, naak tamanna qulimiguullip misissorneqarnerata kingorna aatsaat uppernarsarneqarsinnaagaluartoq, Air Greenland ilisimatitsivoq.
Havarikommissioni ajutoornerup kingorna erngertumik aggersarneqarpoq, maannalu paasissutissat qulimiguulimmit pisariaqartinneqartut kiisalu allagaatit pissarsiarisimalerpai, qulimiguulillu tunniullugu.
- Qulimiguulik piaartumik Nuummukaanneqassaaq misissoqqissaarneqassalluni, timmiartortitseqatigiiffik taama ilisimatitsivoq, qulimiguullip Nuummi misissoqqissaarneqarnerata kingorna ajoqusernerit annertussusaat taakkku aatsaat oqaaseqarfigisinnaavaat.