Skip to main content

Qulaajaasoqarnissaa utoqqatsernissamut aporfiusoq

Oqaluttuarisaanermut tunngasumik qulaajaanissaq, ministeriunerup aggustimi meeqqanut misileraataasimasunut utoqqatsissuteqarnissaanut aporfiuvoq.

Ministeriuneq Mette Frederiksen (S) nukappissat Godhavnimeersut pisortatigoortumik utoqqatserfiginiarlugit Marienborgimut aggustip 13-anni qaaqqulerpagit, allat avaqqunneqartutut misigisimassapput.

Meeqqat  22-t misileeratigineqartutut taaneqartartut nunatsinneersut Mette Frederiksenip Bornholmimi Folkemødertoqarnerani utoqqatserfigineqarnissamik neriorsorneqarput.

Kisianni taakkununnga utoqqatsernissaq maanna kinguartinneqarpoq, tamannalu Enhedslistenimeersup Kalaallit Nunaat pillugu oqaaseqartartuanit Christian Juhlimit tupiguusutigineqarpoq.

- Tamanna ajorpoq. Taanna (Mette Frederiksen, aaqq.) oministeriuninngoruni siullertut iliuusissarinerarlugu oqalugiaammini ersarissorujussuarmik oqarpoq.

- Suliat taakku marluk, utoqqatsertoqarnissaanik oqaaseqarfigineqartut, tassa nukappissat Godhavnimeersut aamma meeqqat misiliutigineqartut tunngavilersorluagaasorujussuupput, kinguartinneqarnissaanut tunngavissaqanngilaq, Christian Juhl oqarpoq.

Aviisip Nordjyskep allaaserisaa naapertorlugu, danskit naalakkersuisui utoqqatsernissamut aalajanginnginnerini, oqaluttuarisaanermut tunngasumik qulaajaaneq naammassineqaqqaarnissaa kinguartitsinermut pissutaavoq.

Kalaallit meeqqat 22-t, 1951-imi Danmarkimut aallartinneqartut, isumaginninnikkut misiliummut ilaapputm tassani kalaaliussusertik tunullugu Kalaallit Nunaanni qallunaatut oqalullutik siuttunngortussaatinneqarlutik.

- Inuunerat taamatut aqussimagatsigu inuit taakku innarlerneqarnikuupput. Amerlasuunut kingunerlutsitsivoq, Christian Juhl oqarpoq.

Aaja apeqquteqartoq

Kalaallit Folketingimut ilaasortaatitaat Aaja Chemnitz Larsen (IA), utoqqatsernissap kinguartinneqarneranut atatillugu Mette Frederiksenimut apeqquteqarpoq.

- Aaja Chemnitz Larsen qanoq akineqassanersoq takulaassavara, Christian Juhl oqarpoq, nangillunilu:

- Ersarinngippat, apeqqutinik allanik malitseqartissavara, Mette Frederiksenilu nukappissanut Godhavnimeersunut utoqqatsernermini aamma meeqqanut utoqqatsernissaa kajumissaarutigalugu.

Oqaluttuarisaanermut tunngasumik meeqqat 22-t pillugit qulaajaaneq VLAK-it naalakkersuisuusimasunit aamma nunatsinni Naalakkersuisunit februaarimi aallartinneqarpoq. 2020-mi piareernissaa naatsorsuutigineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER