Qulaajaanerup ukiorpassuarni anniaataasimasut ilaasa qaangerneqarnissaat Múte B. Egedep neriuutigaa
Sorsunnersuup aappaata kingorna pisimasunik qulaajaasoqarnissaa pillugu Kalaallit Nunaata Danmarkillu isumaqatigiissuteqarnerat Múte B. Egedemit nuannaarutigineqarpoq. Kinguaariit tulliuttut isertuunneqarsimasunik misigisaqassanngillat, oqarpoq.
Kalaallit Nunaata Danmarkillu sorsunnersuup aappanit pissutsit pillugit oqaluttuarisaanermik qulaajaasoqassasoq, Naalakkersuisut danskillu naalakkersuisui isumaqatigiipput.
Qulaajaaneq kalaallinut siunissamut ungasinnerusumut iluaqutigissagaat Naalakkersuisut siulittaasuat Múte B. Egede oqarpoq.
- Pissutsit akueriuminaatsut qaqilertorneqartussanngorput. Pereersut toqqortornagit pisimasut tamaasa qaqilerneqassapput, Naalakkersuisut siulittaasuat Sermitsiaq.AG-mut oqarpoq. Taanna Naalagaaffeqatigiit ataatsimiinneranni Savalimmiuni Thorshavnimi peqataaqqammerpoq.
Kalaallit Nunaata siuarsarneqarnerata nalaani, sorsunnersuup aappaata qaangiutereernerani pisut qulaajarneqassapput.
Pisimasut amiilaarnartut
Ukiuni kingulliunerusuni pisimasut arlallit saqqummeqartalerput, soorlu meeqqanik misiliuteqarnerit, inatsisitigut ataataqanngitsunik suliat kiisalu kingullertigut spiralilersuisimanerit.
Nunasiaanerup qaangeriartuaarneqarnerani pisimasut DR-ikkut podcastikkut qaqilertorneqareerput, maannalu itisilerlugit misissuiffigineqartussanngorlutik.
- Taamaasilluni pereersut akuerineqarsinnaalissapput, maannakkummi inuunitsinnut suli sunniuteqartorujussuupput. Pisimasut suliarineqassapput, ingerlariaqqittoqassallunilu, Múte B. Egede oqarpoq.
Ukiorpassuarni anniaataasimasut qaangerneqarnissaat neriuutigaa.
- Pisimasut kinguaatta misigissanngilaat, inuiaqatigiittut nukittunerulissaagut, siunissami pereersut sunniinnginniassammata, oqarpoq.
Múte B. Egede Savalimmiuniikkallassaaq, pisortatigoortumik sapaatiuppat aaqqissuussani peqataassalluni.