isornartorsiuineq
Qujaukitsup oqariartuutai Randip isumaqatiginngilai
Vittus Qujaukitsoq avissaartuutsitsivoq, tamannalu akuerineqarsinnaanngilaq, Demokraatit siulittaasuat isumaqarpoq
- Ajuusaarnaraluartumik Amerikkarmiunik Danskinillu suleqateqarneq appasilluinnartumik eqqartorneqaleruttorpoq. Akisussaassuseqanngitsutullu Vittus Qujaukitsoq Danskit tusagassiiviini saqqumilaarpoq, piviusumik ajornartorsiutaasut avaqqutiinnarlugit ersarissagaalluinnartullu tunuinnarlugit, eqqartuinermi uani tunngaviliisussaagaluit tusaanngitsoortillugit.
Demokraatit siulittaasuat Randi Vestergaard Evaldsen Facebookimi quppernermini ippassaq pingasunngornermi allappoq.
Vittus Qujaukitsoq (S) Danmarkip Kalaallit Nunaata nunanut allanut sillimaniarnermullu politikkimut sunniuteqarnerujumalluni kissaateqarnera tusaanngitsuusaarnerarlugu annerunniarnerarlugu unnerluutigai. USA Pituffimmit anisissallugu nalagaaffeqatigiinnillu Nunarput anissasoq sioorasaarutigaa.
Atuaruk: Vittup Danmark USA-lu sioorasaarpai
Qujaukitsoq avissaartuutsitsivoq
Vittus Qujaukitsoq Kim Kielsenilu (tamarmik Siumumeersut) ajornartorsiut aaqqiffiginiarnissaanut ilungersornerusariaqartut Demokraatit siulittaasuata neriuutigaa.
- Vittus Qujaukitsup periarfissaq uani atorpaa saqitsaatsitsilluni, suliassani alaannarlugit. Tamanna akuerineqarsinnaanngilaq – Demokraatiniillu isumaqarpugut aaqqiissutissanik suleriuseqartoqartariaqaraluartoq siunissaq ungasinnerusoq isigalugu aaqqiisinnaasunik, asuli saqitsaatsitsiinnarani, Randi Vestergaard Evaldsen erseqqissaavoq.
Atuaruk: Namminiilivinneq ima aningaasalersorneqassaaq
Naammagittaannarsinnaajunnaarpoq
"Vittus Qujaukitsup takutiinnarpaa, nunanik allanik suleqateqarnermi piffissaq eqqorlugu eqqartuisinnaanermut ilisimasai amigartut - uani apeqqummi pingaarluinnartumi, Naalagaaffeqatigiinnerup iluani suleqatigiissinnaanermut aamma tunngatillugu, siunissarluni ungasinnerusoq isugalugu aaqqiissutissanik pilersitsinissamut." taassuma tikkuarpaa.
- Ukiorpassuarni Vittus Qujaukitsoq Nunarput sinnerlugu angalasarsimavoq. Angalanerminilu angusat takusinnaannginnamigit, massakkullu suliaminut naammagittarneq amigaatigilersimavaa, naalakkersuisooqatigiinnilu avissaartuunnermik aallartitsilluni, Randi Vestergaard Evaldsen isumaqarpoq.
Atuaruk: Vittus pillugu Løkke ernumassuteqanngitsoq
Oqallinneq ajunnginnerusoq ujartorpaa
- Illuatungaani nammineq Lars Emil-ilu inissisimapput, Nunanut allanut tunngassutilinnut erfalasumaarlutik, illuatungaanilu allat, politikkikkut suliarilluakkanik allannguerusussusillit, siunissarlu ungasinnerusoq isigalugu namminiilivinnissamik suliaqarusuttut.
- Neriuutigilluinnarpara suliassat imak angitigisut, nunatsinnullu isumaqatigiissut qaffasinnerumik inissisimalluta eqqartorsinnaassagigut – pissusissamisuunngilluinnarpoq imak appasitsigisumik eqqartuissalluta – aaqqiissutissanik eqqartuisa, siunissaq ungasinnerusoq isingalugu aaqqiisa, akissussaasuseqarta minnerunngitsumillu isumatusaartumik silassorissumillu, Demokraatut siulittaasuat oqarpoq.
Aamma atuakkit:
Issittumi suleqatigiinneq isornartorsioraa
Vittus uummaarissumik oqallitsitsisoq
Kimip Vittu isumaqatiginngilaa
Randi Vestergaard Evaldsenip Facebookimini isummersornera ataani atuaruk: