Siumup ataatsimeersuarnera
Qujaukitsup nalunaarutiginnissimanera Siumup ilaasortaasa paasisinnaangaat
Vittus Qujaukitsup siumumi siulittaasutut qinigassanngortittup parteeqatini marluk ingutsisimasutut nalunaarutigisimavai. Qujaukitsulli sooq parteeqatiminik nalunaarutiginnissimanera, parteeqataasa paasisinnaalluarpaat
- Vittus Qujaukitsoq ingutsitaalluni misigisimanguni parteeqatiminik nalunaaruteqassalluni pisussaaffeqarpoq.
Siumumi ilaasortaq Enok Sandgreen Aasiammiu, Vittus Qujaukitsup ingutsitsineq pillugu parteeqatiminik marlunnik nalunaarutiginnissimanera pillugu qanoq isumaqarfigineraa aperineqarami Sermitsiaq.AG-mut oqarpoq.
Politikerip assortuussutaasup tusatsiakkanik tunngavissaqanngitsunit malersorneqartutut misigisimanini, Naalakkersuusimasoq Kinami sulitilluni angalanermini aalakoorsimasutut pisuutinneqarnini, aviisimi AG-mi oqaatigaa.
Atuaruk: Vittup inuit marluk ataqqinassutsimut innarliisutut nalunaarutigisimavai
Ingutsinerit unitsinneqarlik
Vittus Qujaukitsoq, Kim Kielsenimut unammillertuusoq Siumumi ilaasortanik marlunnik nalunaarutiginnissimanera, Enok Sandgreenip paasisinnaalluarpaa.
- Uanga nammineerlunga tusatsiakkat Nunatsinni atungaaqisut nuannarinngitsorujussuuvakka. Tamanna unitsittariaqarpoq, ingutsisarnerilli qanoq unitsinneqarnissaat oqaloqatigiissutigisariaqalerparput, Enok Sandgreen oqarpoq.
Vittus Qujaukitsiup parteeqatimi marluk eqqartuussivimmut nalunaarutiginnissimanera Apollo Jerimiassenip Saattumiup aammattaaq paasisinnaalluarpaa.
- Vittus Qujaukitsoq ingutsinneqarneratigut ajortisarneqariarnera assut kusanaappoq. Soorunami Qujaukitsoq malersungaalluni misigisimassaaq, ingutsitsisunillu nalunaarutiginninnissani pisussaaffigivaa. Taama iliuuseqarnera pitsaavoq, politikkerimmi amerlanerit siunissami taama iliuuseqartalissapput, ingutsitsinerimmi unitsittariaqarput, taanna Sermitsiaq.AG-mut oqarpoq.
Nalunaarutiginnissanerluni eqqarsaatigeqqaassangaluaraa
Siumup Inuusuttaani siulittaasup Steve O. Sandgreeni, Vittus Qujaukitsutut inissisimangaluaruni eqqarsarluaqqaarsimanngaluarpoq.
- Taanna parteeqatiminik nalunaarutiginnissimanera apeqquserneqarsinnaavoq. Kisianni misigisimanguni eqqunngitsumik iliorfigineqarluni tamanna pisussaaffigaa, taanna oqarpoq.
- Vittus Qujaukitsup Siumumi ilaasortanik marlunnik nalunaarutiginninnera paasisinnaaviuk?
- Naluara. Qanoq inissisimaneq apeqqutaavoq. Kisianni taama pineqarnini nuannarinnginnamiuk taama iliorsimavoq. Uanga taannatuulli inissisimangaluaruma eqqarsaatigilluaqqaarsimassangaluarpara, taanna oqarpoq.
Ingutsineq akuerineqarsinnaanngitsoq
Inatsisartuni ilaasortap Laua Taunajik Vittus Qujaukitsoq paasisinnaavaa.
- Siumumi ilaasortat ilaasa tassunga ingutsitsisut akuersaarneqarsinnaanngillat. Taanna parteeqatitsinnik qulanngilluinnaruni nalunaarutiginnissimavoq, qularinngilarali imminut illersorniarluni taakkuninnga nalunaarutiginnissimasoq.
- Politikkikkut akerliungaluarutta akerliunngikkittaluunniit immitsinnut ataqqeqatigiissaagut, ingutsitsisulli taakku paasisinnaanngilluinnarpakka. Inuiaqatigiit ikittuaraavugut, taamaammat isumaqarpunga nukiit taama ingutsitsinernik atorneqartariaqanngitsut, Laura Taunajik oqarpoq.
Sammisaq pillugu Siumumi ilaasortat arlallit Sermitsiaq.AG-mit oqaloqatigiumaneqarsimangaluarput, kisianni ilaasortat arlallit taama apeqquteqarneq akissuteqarfigerusunngilaat.
Siumumi ilaasortat kikkut eqqartuussivimmut sassartitassanngortissimanerlugit, Vittus Qujaukitsup oqaatigerusunngilai.