Qujaukitsup Inatsisartut avoqqaarai: Akisussaaqataarusunnginneq utoqqalinersialinnut kingunerluppoq
Aningaasaqarneq qajannaatsumik inissisimagaluartoq, politikkikkut aalajangersaaniarnerni Inatsisartut piumassuseqannginnerat minnerunngitsumillu akisussaassusilimmik aningaasaqarnikkut ingerlatsinissamik qulakkeerinniaqataarusunnginnerat aningaasaqarnerup pitsaanngitsumik inississinnaaneranik ajornerpaassappallu iluarsiuminaatsumik ajorseriarneranik kinguneqarsinnaasoq, aningaasaqarnermut akileraartarnermullu naalakkersuisoq, Vittus Qujaukitsoq (NQ) uparuaavoq
Ilisimaneqartutut Inatsisartut upernaakkut ataatsimiinnerat qaangiussimalereerpoq, tamannali isumaqanngilaq Inatsisartut katersuunnerminni suliassatik tamakkerlugit naammassisimagaat taamaalillutillu suliat timitaleriaannanngorsimasut.
Aviisi Sermitsiaq taama allaaserisarpoq.
Naammassineqanngitsunut ilaavoq Inatsisartut inatsisaasa assigiinngitsut allangortinneqarnerat aamma akileraarutit akitsuutillu kiisalu aningaasanik nuussinikkut isertitat pillugit Inatsisartut inatsisaata allanngortinneqarnissaannik naalakkersuisut siunnersuutaat. Siunnersuut aqqutigalugu naalakkersuisut Inatsisartunut assammik isaassigaluarput, pingaartumik innuttaasut pisortanit ikiorsiissutinik utoqqalinersianillu inuussuteqartut oqilisaaffigineqarnissaat siunertaralugu.
Siunnersuut taanna 2017-mi procenti aaqqiissutissamut aammalu aningaasarsiat atuuttunut nalimmassaanermut tunngassuteqarpoq, taamaalilluni aningaasat nalinginnaasumik naleerukkiartornerat ilutigalugu pingaartumik aningaasanik nuussinikkut isertitat akitsuutillu annertussusaasa arlallit naleerukkiartornissaasa pinaveersimatinneqarnissaat siunertaralugu ingerlaavartumik iluarsiissuteqartarnissamut tunngavissamik qulakkeerinissaq procentip aaqqiissutissaq siunertarineqarluni.
Taamaakkaluartorli naalakkersuisut naatsorsuutiginngisaannik siunnersuutip suliarneqarnerani pisoqarpoq, tassami aningaasaqarnermut akileraartarnermullu ataatsimiititaliami amerlanerussuteqartut piumasaraat siusinaartumik pensionisiallit aammalu utoqqalinersiallit aaqqiissuteqarfigineqassasut, taamaattorli aamma piumasaralugu aningaasartuutaanerusussat matussuserneqarnissaannut eqqanaarinninniarluni eqqussuinermut akitsuutit ilaasa, aaqqiinerup ilutigisaanik, nalimmassarneqarnissaannik naalakkersuisut siunnersuuteqaraluarnerat itigartinneqassasoq.
Tamanna pillugu Sermitsiami paasisaqarnerugit – uani ataani aviisimut isissutissarsigit: