Qujaukitsoq: Nunamit qimaalluni akiligassat peerunnavianngillat
Innuttaasut pisortanut akiligassallit siunnersorneqarnermikkut aningaasanik aqutsineq ilinniassavaat akiligassatik qimarratiginiaannarnagit, akiligassammi qimarratigineqarsinnaanngillat, aningaasaqarnermut nunanullu avannarlernut tunngasunut naalakkersuisoq Vittus Qujaukitsoq (NQ) oqarpoq
Aningaasaqarnermut nunanullu avannarlernut tunngasunut naalakkersuisoq Vittus Qujaukitsoq (NQ) kajumissaarivoq inuiaqatigiit tamarmik ataatsimoorlutik nunap aningaasarsiornikkut atasinnaasumik ineriartortinnissaanik kissaatigisaq piviusunngortinniassagaat, tamatumunngali tunngavissaavoq pisussaaffinnik naammassinnittarnissaq.
Nalinginnaasumik oqaatigiuminaappoq sooq kalaallit taama amerlatigisut Kalaallit Nunaat tunulliuttarneraat, Naalakkersuisulli naliliipput ilaat isumaqartut akiligassat qimarratigineqarsinnaasut, taamaasiortoqarsinnaanngilarli.
Akiligassanit qimaasoqarsinnaanngilaq
Namminersorlutik Oqartussat, kommunit qallunaallu kommuuniisa kiisalu nunat avannarliit tamarmik suleqatigiilluarnerat pissutigalugu innuttaasut ajornanngitsumik sumiissusersineqarsinnaapput, taamaattumik Kalaallit Nunaanni pisortanut akiligassaqaraanni qimarratiginissaat ajornarluinnangajappoq.
– Inuit erloqinartumik inissisimalersarput akiligassat ima amerlatigileraangata, nammineq atugarisat qulaajarsinnaanngingajallugit. Taamatuttaaq erloqinartumik inissisimasoqalersarpoq inuit nunamit aallaraangata, neriuutigalugu pitsaanerusunik atugassaqalissallutik. Misissuinerit takutippaat nunamit aallartarnermut pingaarnerusumik pissutaasut: suliffissaaleqineq, inissaaleqineq, meeqqat paarineqarneranni atugassarisat atuarfiillu, meeqqanut atugassarititanik naammaginninnginneq aammalu nioqqutissat ulluinnarni atorneqartartut akisunerujussuat. Aammaaqqilluguli, inuit amerlanerusut nunanut allanut, matumani Danmarkimut, nunassittarnerannut pissutaasut pingaarnerit ilagaat akiligassanik qimarratiginninniarneq, akiligassalli qimarratigineqarsinnaanngillat, Vittus Qujaukitsoq erseqqissaavoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: