canadami paasisassarsiorneq
Qujaukitsoq illuatungiliuttunut: Piaaraluta peqataatinngitsuunngilatsigit
Canadamut urani pillugu paasisassarsiornermut angalanermi piaaraluta peqataatinngilatsigit, taamaaginnarpoq. Vittus Qujaukitsoq Inuit Ataqatigiinnut akissuteqarpoq
Angalanermut nalunaarusiamik kingusinnerusukkut saqqummersitsiumaarpugut, tamanna naammappoq.
Inuussutissarsiornermut, suliffeqarnermut niuernermullu naalakkersuisup Siumumeersup, Vittus Qujaukitsup Canadamut Naalakkersuisut paasisassarsiorlutik angalaqqammernerannut allakkatigut apeqqutinut akissutai peqqarniillillugit taama nipeqarput.
Australiamut angalaqatigiittut
Urani pillugu paasissarsiorluni angalanerit pinikuupput 2010-mi (Canadami) aamma 2014-mi (Australiami).
- Angalanermut peqataasinnaasimagaluartut ilaassannginnerannik Naalakkersuit piaaralutik toqqaasimanngillat, Qujaukitsoq Inuit Ataqatigiinneersumut Juliane Henningsenimut apeqquteqartumut allappoq.
- Ilisimaneqartutut Naalakkersuisut aamma Inatsisartuni Aatsitassanut Ataatsimiititaliaq 2014-imi Australiamut assingusumik angalanissaq aaqqissuuppaat, taanna erseqqissaavoq.
Atuaruk: Nuuk Kunstmuseum uranimut isornartorsiuerpalaartumik takutitsivoq
Inatsisartut politikeriinut akissummi aamma allaqqavoq, Naalakkersuisut Aatsitassanut Ataatsmiititaliaq ilisimatissimanngilaat, pissutigalugu isumaqaroqarmat angalaneq inatsimmut attuumassuteqanngimmat Aatsitassanut Ataatsimiititaliap ilisimatinneqarnissaanut, aatsaat 'aalajangiinernut inuiaqatigiinnut imaluunniit avatangiisinut annertuumik sunniuteqarsinnaasunik'.
- Taamaassappammi ataatsimeeqattaarnerpassuit pillugit ilisimatitsissuteqartoqartariaqassaaq, tamannalu Naalakkersuisut nalilersuinerat naapertorlugu inatsisaasumut siunertaasimanngilaq, inuussutissarsiornermut naalakkersuisoq Vittus Qujaukitsoq allappoq.
Akerliusunik naapitaqanngitsoq
Juliane Henningsenip illuatungiliuttuneersup aamma akissutiserusuppaa Qujaukitsoq suleqatinil uranimut akerliusunik Canadamiinnerminni naapitsinissaminnut piffissaliisimanersut.
Tassunga apeqqummut akivoq, Naalakkersuisut 'soqutigisaqaqatigiit kattuffiat aalajangersimasoq, uranimik saqqummiussamisut akerliusoq pinnagu'.
Kisianni tamanna angalanerup nalunaarusiornerani Naalakkersuisut nittartagaanni takuneqarsinnaanngorpat atuarneqarsinnaavoq, naalakkersuisuni ilaasortaq ilisimatitsivoq.
- Assersuutigalugu angalaqatigiit attaveqarfinni arlalinni nunat inoqqaavinik sinniisoqartunit oqartussaasoqarfinnit suliffeqarfinnillu siniisuutitat naapippaat, Siumumi politikereq allappoq.