Quersorneq, kissaneqarneq, annerisaqarneq: Kalaallit Nunaanni coronamik tunillatsisimasut nuattutut ippigisaqartarput

COVID-19-ip ersiutai arlallit nunarsuaq tamakkerlugu peqqinnissaq pillugu kattuffissuup WHO-p allattorsimaffiani maanna allassimalersimapput.

Kalaallit Nunaanni inuit maannamut 16-it coronavirusimik tunillatsissimapput. Taakkunannga 14-it peqqisseqqereersimallutik.

- Kalaallit Nunaanni coronavirusimik nappaateqartut assigiinngitsutigut nuannerup ersiutaanik atugaqartarput, Nunatsinni Nakorsaaq Henrik L. Hansen ilisimatitsivoq.

Taamaammat Kalaallit Nunaanni coronavirusmik tunillatsissimasut unitsinneqarnissaannut tunngavissaqartarsimanngilaq.

Oqartussat innersuussutaat:

Assaat eqqiluisaartinneqassapput.

Kakkissarfimmut talinnulluunniit tangajorit quersorlutilluunniit.

Qitserarnaveersaarit.

Assamminnerit, ulussakkut kuninnerit pakkunnerillu pinaveersaakkit - timikkut allap attornissaa killeqartiguk.

Eqqiluisaarneq silaannarissartarnerlu eqqumaffigikkit.

Napparsimanermut ersiuteqaruit angerlarsimaannarit.

Allanut qanillinaveersaarit.

Pissarsiffik: Nakorsaaneqarfik

VOVID-19-imulli amerlanerusunik ersiuteqarpoq innuttaasunit eqqumaffigineqartariaqartunik.

- Ersiutit nalinginnaasut tassaapput kissarneqarneq, quersorneq, anernikilliorneq, qasoqqaneq, ujallerineq, toqqusaarlunneq, nerisat mamassuseerunnerat tipimillu naamasaarunneq, Henrik L. Hansen oqaluttuarpoq, nangillunilu:

- Inuit ilaat aamma atugaakulannginnerusunik allanik ersiuteqarsinnaapput. Taakku assersuutigalugu tassaasinnaapput nuffaserneq, niaqorlunneq, isikkut aseruuttoorneq timminnerlu.

Kingunerlutsitsisoqarsimanngitsoq

Kalaallit Nunaanni ullumikkut marlunnik coronavirusimik tunillatsisimasoqarpoq. Nunanni nakorsaanerup ilisimatitsissutigaa, pineqartut maannakkorpiaq angerlarsimaffimminni mattusimatinneqartut. Tassa qanoq innerat naapertorlugu napparsimmavimmut unitsinneqartariaqanngillat.

Inuit angerlarsimaffimmi mattusimatinneqartut aneqqusaanngillat.

Nunani allani tusagassiorfiit arlallit paasissutissiissutigisarpaat, coronavirusimik nappaateqarsimasut kingusissukkut kingunerlutsitsilersartut, soorlu aallussiuminaatsitsineq, nerisat mamassuseerunnerat eqqaamannissinnaajunnaarnerlu, taamaattoq Kalaallit Nunaanni coronavirusimik nappaateqarsimasut kingunerlutsitsisarnersannik suli nalunaaruteqartoqarsimanngilaq:

- Nunatsinni Nakorsaanermut ilisimatitsissutaasimasut naapertorlugit, Kalaallit Nunaanni COVID-19-imik tunillatsissimallutik peqqisseqqereersimasut akornanni kingunerlutsitsoqarsimanngilaq, Henrik L. Hansen ilisimatitsivoq.