Quasalluinnartoq: Norsaq kalillugu timmisartoqarfiup illutaanukaanneqartariaqarsimasoq
Air Greenland Kangerlussuup mittarfiata quasanneranit sisamanngornermi unammillernartoqartitsisimavoq. Silaannakkut angallanneq Nuummi silarlunneranit innaallagissallu qamittarneranit sunnerneqarsimavoq.
Kangerlussuup mittarfiata sisamanngornermi qaqutigoorluinnartumik quasannera Air Greenlandimut ajornartorsiortitsisimavoq.
Timmisartorsuaq Norsaq mittarfimmut missimavoq, nammineerlunilu mittarfiup illutaata tungaanut ingerlasinnaasimanngimmat kalinneqartariaqarsimalluni.
Taamatut pisoqarnerata malitsigisaanik Dash 8-t marluk pilersaarutaasumit kingusinnerusukkut mittariaqarsimapput, Air Greenlandimi attaveqartarnermut pisortaq Katja Vahl ilisimatitsivoq.
Innaallagissap qamittarneratigut silallu allanngorarneratigut sineriak tamarmik marlunngornermi pingasunngornermilu timmisartumik ingerlavissaasimanngilaq. Ulluni marlunni kingullerni unammilligassarpassuusimagaluartut timmisartut amerlanersaat aallarsinnaasarsimapput aamma ilaasussat aallarfissat nutaat angalaffissatullu pilersaarutit nutaat pillugit paasissutissinneqarsinnaasarsimapput.
- Timmiasartuni ilaasussat katillugit 450-it missaanniittut pisunit sunnerneqarsimapput, sulisulli tamarmik sulilluarnerisigut ilaasussat aallarfissanut nutaanut nuunneqarsimallutik, taamalu sila atoruminarseriaraangat annguffissaannut anngunneqartarsimallutik, Katja Vahl oqarpoq.
Sarfaaruttoq
Air Greenlandip Nuummi ajornartoortoqarnerani sillimmataasumik nammineq sarfaliuutaa ingerlasimavoq, atortullu pingaaruteqarnerpaat ingerlatissinnaasimallugit, soorlu aamma sila atoruminarseriaraangat timmisartuussisarnerit ingerlatiinnarniarlugit Mittarfeqarfiit timmisartunik sermiiaanermut ikiuussimasut.
Hangarimi mekanikerit immikkut jakkelersuullutik, qaamikkut qaammartartulerlutik, pappialat aqerluussallut atorlugi suliaqarsimapput, kiisalu oqarasuaatit mailillu attaveqarfii pitsaanerpaat nassaariniarlugit angerlarsimaffimmit sulisoqartarsimalluni. Attaveqaatit kipisaqattaarnerat suli unammillernarpoq, taamaammat sullitatsinnut tamanut kaammattuutigaarput attaveqarnissamut imersugassaq allaffigeriarlugu piaarneraamik nassiuteqqullugu, tassalu una iserfigalugu immersorneqassaaq: https://saaff.airgreenland.gl/CancelRequest/Index/da
Sisamanngornermi angallaffissat
Ullumi sisamanngornermi silap pitsaavallaannginnera aamma sarfaaruttoqartarnera kiisalu oqarasuaatinut attaveqaatit kipisarnerat unammillernaqqissimapput.
- Aasianneersut, Narsarsuarmeersut Nuummeersullu ullumi Kangerlussuarmiit Københavnimukarnissaat eqqarsaatigalugu nunami maani timmisartuussiniarneq maannakkorpiaq unammillernartipparput.
Ilaaussat katillugit 93-it ullumikkut tamatumannga eqqugaaqqapput. Taamaammat arfininngorpat Kangerlussuarmiit Københavnimut timmisartuussiniarluni Atlantic Airwaysimit timmisartumik attartortoqarsimavoq, ilaasussat tamaasa annguffissaannut anngunniarlugit.
- Ullumi nal. 17.00 nallertinnagut ilaasussanut tamanut angalaffissatut pilersaarutit nutaat nassiunneqassapput. Taamaammat ilaasussanut tamanut kaammattuutigaarput mailitik sms-itillu takusaqqullugit imaluunniit namminneerlutik airgreenland.dk-kkut 'Min Flybillet’ aqqutigalugu misissueqqullugit.
- Pissutsit ilungersunaraluartut ilaasussatta anguffissaminnut anngunnissaat anguniarlugu sulisuvut tamarmik tamaviaarlutik sulipput, Air Greenlandimit oqaatigineqarpoq.