Nukissiorfiit

Qorlortorsuaq pillugu suliaq isumaqatigiissuteqarfigineqartoq

Energikonsortiet I/S Nukissiorfiillu erngup nukinganik innaallagissiorfik Qorlortorsuaq pillugu isumaqatigiissuteqarput

Qorlortorsuarmi imermik nukissiorfik pillugu Energikonsortiet I/S-imik Nukissiorfiit isumaqatigiissitsiniaanikkut isumaqatigiissuteqarput.

Energikonsortiet I/S Nukissiorfinnut 34 million koruuninik akiliuteqassaaq, Qorlortorsuarmi aamma Narsami aningaasartuutit aalajangersimasunut tamanna 2016-imi pitsaasumik sunniuteqassaaq. Aammattaaq isumaqatigiissitsisoqarneratigut advokatinut siunnersortinullu aningaasartuuteqartoqarunnaassaaq, tamanna maannakkumut aningaasartuutinut aalajangersimasunut kinguneqarnerlutsitsisimammat.

Isumaqatigiissitsinnermi pineqarput maannakkut siunissamilu Nukissiorfinnit Energikonsortiet I/S-imut piumasaqaatit tamarmiusut, taamaalillunilu suliaq 2009-mili ingerlanneqartoq naggaserneqarluni.

- Pitsaasorujussuuvoq suliap matuma sivisuumik ingerlanneqarsimasup naammassineqarnera. Nunap Immikkoortua Kujalleq maannakkut iliuuseqarsinnaanngorpoq nukissiuuteqarfimmi kukkunerit amigaatillu aaqqiiviginissaannut, Nukissiorfiit pisortaat Henrik Estrup oqarpoq.

Nukissiorfiit 2003-mi Energikonsortiet I/S-imit suliassamik tamarmiusumik suliarinninnissamut isumaqatigiissuteqarput, taamanikkut E. Phil og Søn A/S, ISTAK Ltd., YIT A/S kiisalu Landsvirkjun ingerlatsisuusut, Qorlortorsuarmi imermik nukissiorfiup sanaartortinnissaanut. Sanaartugaq naammassineqareermat Energikonsortiet I/S Nukissiorfinnut piumasaqaateqarpoq 235 million koruuninik erniat ilanngullugit.

Aggustimi 2012-imi illuatungeriit isumaqatigiissutigaat Nukissiorfiit 57 million koruuninik Energikonsortiet I/S-imut akiliuteqassasoq aamma Energikonsortiet I/S pisussaatinneqarluni sanaartukkami kukkunerit amigaataasullu arlalippassuit pitsanngorsarnissaannut. Tamatuma kingornatigut illuatungaanit piumasaqaatit isumaqatigiissitsiniarnikkut eqqartuussivimmit misissorneqarput nalilersorneqarlutillu illuatungeriit maannakkut piumasaqaatit pillugit isumaqatigiissutigineqarnerisa tungaanut.

Suliat tamakkununnga assingusut pinngitsoortinniarlugit Nukissiorfiit maannakkut siunissamilu sanaartukkat sanaartugassallu annertuut, tamatumunnga ilanngullugit Sisimiuni aamma Ilulissani imermik nukissiorfiit, arlaannaannulluunniit attuumassuteqanngitsunik inuttalimmik nakkutilliinermik suliaqartussanik aallarniivoq pilersinneqartunillu. Nakkutilliinermik suliaqartut isumaqatigiinngissutit tamaasa isumagaat sanaartornerup ingerlanerani Nukissiorfiit aamma entreprenørip akornanni pilersinnaasut. Taamaaliornikkut Nukissiorfiit qulakkeersimavaat ingerlaavartumik isumaqatigiinnginnerit isumagineqarnissaat aamma nakkutiginninnermik suliaqartut isumaqatigiinnginnermik aalajangiisarlutik, sanaartornermut suliap ingerlanneqarnerani. Taamaalillutik aaqqiagiinngissutit annertusiartortanngillat.

Powered by Labrador CMS