Qiviut ApS-imik aallarniisimasoq nersornaaserneqartoq

GrønlandsBANKEN-ip Inuussutissarsiornermut Aningaasaateqarfiata ukioq manna
aallartisaasumut akissarsiaritittakkani Anita Høegh, Qiviut ApS-imut tunniunneqassasoq
toqqarpaa. Nersornaasiineq Future Greenlandip Nuummi sapaatip-akunnerani matumani ataatsimeersuarnerani pivoq.

- Anita Høegh niuernermut silassorissutsikkut ilungersuuteqarnikkullu nioqqutissamik nunatsinneersumik immikkuullarissumillu pilersitsivoq, Kalaallit Nunaanni nunarsuullu sinnerani tuniniarneqarsinnaasumik, niuertarfiit saniatigut webshop-imik, Kalaallit Nunaata sinneranut kiisalu nunarsuup sinneranut anngutsitsisumik pilersitsinikuugami. Tamanna GrønlandsBANKEN-ip Inuussutissarsiornermut Aningaasaateqarfianit nersorusupparput, Kristian Lennert tusagassiorfitsigut nalunaaruteqarnermi oqarpoq.

Tunisassiaq nunami maan nunanilu allani pilerigineqarluinnartuuvoq.

Inuussutissarsiornermut aningaasaateqarfiup ukiuni arlalinni aallartisaasumut
akissarsiaritittagaq inummut imaluunniit suliffeqarfimmut, immikkut maluginiarneqartumut
tunniuttarpaa, ukioq mannalu toqqarneqarpoq Anita Høegh, Qiviut ApS, taassuma akissarsiaritittagaq tiguaa 2008-mili umimmaap qiviuanik nioqqutissiornerup tunisinerullu iluani immikkut ilisimasaqarnini tunngavigalugu.

- Anita Høeghip atortoq kissassimaarut iluartoq pitsaalluinnartumik akullugu,
najugaqartunut takornarianullu pilerinarluinnartoq pilersippaa. Matumani Qiviut ApS-ip
najukkami pisiortorfiit siuarsaaqataaffigai, siusinnerusukkut kialuunniit
angusimanngisaanik, siulittaasoq erseqqissaavoq.

Anita Høegh piniartunut pisisarnikkut kiisalu amernit qiviunik piiaanikkut, immikkoortiterinikkut, saliinikkut kiisalu nioqqutissiorluni qissinikkut kalaallit
nioqqutissiaannik immikkuullarissumik pilersitsivoq, tamakku tamarmik tunisassiamik
naleqalersitsinermi immikkoortunut tamanut iluaqutaasumik. Ukiumi aallartisaasumut
akissarsiamut checki kr. 25.000 nalinganut ilaavoq, tusagassiorfitsigut nalunaaruteqarnermi oqaatigineqarpoq.