Qivioq Løvstrøm: Inuit pisinnaatitaaffii allat unioqqutinneqarsimanersut misissortariaqarput
Arnat inuusuttullu naartulersinnaasut 4.500-it 1966-imiit 1975-ip tungaanut nakorsanit qallunaanit spiralilersinneqarsimapput, aamma akuersisoqanngikkaluartorluunniit. Suliat pisinnaatitaaffinnik unioqqutitsisut amerlanerusinnaanerat naatsorsuutigaara, Qivioq Løvstrøm oqarpoq.
Nunatsinni spiralilersuisimaneq pillugu misissuisoqartariaqarpoq, suliallu allat suli ilisimanngisagut aamma qaqilerneqartariaqarput.
Inuit Pisinnaatitaaffii pillugit Siunnersuisooqatigiinni siulittaasoq Qivioq Løvstrøm taama oqarpoq.
Taanna isumaqarpoq innuttaasut inuit pisinnaatitaaffiinik ilisimasaqalernerunerat pissutigalugu pisut pisinnaatitaaffinnik unioqqutitsinerusut qaqilerneqaleriartortut. Spiralilersuinerlu suliaasinnaasoq aatsaat siulleq, allanik malitseqartussaq.
- Inuit pisinnaatitaaffii pillugit ilisimasagut annertunerulernikuupput. Isumaqarpugut qulaajaasoqartariaqartoq nunasiaataanerup kingorna pisinnaatitaaffinnik allanik unioqqutitsisoqarsimanersoq paasiniarlugu. Isumaqarpunga spiralilersuisimaneq suliani siulliit ilagiinnaraat, Sermitsiaq.AG-mut oqarpoq.
Taassuma ilaatigut tikkuarpai nunap inoqqaavisa pisinnaatitaaffii, inuttut atukkatigut qulakkeerinninneq peqqinnissalluunniit iluani misissuisoqarsinnaasoq.
Inuiannik nungusaaneq imaluunniit
Inuit Pisinnaatitaaffii pillugit Siunnersuisoqatigiit aamma Inuit Pisinnaatitaaffii pillugit Institutti, politikerit assigalugit misissuisoqarnissaanik piumasaqarput.
Aki-Matilda Høegh-Damip spiralilersuisimaneq inuiannik nungusaasoqarniarneranik taavaa. Taamaattoqarsimanersorlu inuit pisinnaatitaaffii pillugit siunnersuisoqatigiit maanna nalilersinnaanngilaat:
- Inuiannik nungusaaniartoqartillugu ima paasineqartariaqarpoq inuiaat pineqartut nunguillugit nungunneqartussaassasut. Naalagaaffiit Peqatigiit nalunaarutaanni tamanna inuit pisinnaatitaaffiinik unioqqutitsineruvoq sakkortunerpaatut nalilerneqartussaq. Taamaammat pingaaruteqarpoq qulaajassallugu spiralilersuinermi suna siunertaasimasoq. Spiralilersuinermi inuiaat nungunniarneqarsimanersut paasiniarneqarsinnaavoq, Qivioq Løvstrøm, Inuit Pisinnaatitaaffii pillugit Siunnersuisoqatigiinni siulittaasoq nassuiaavoq nangillunilu:
- Uani oqanngilanga isumaqataanersugut isumaqataannginnersugulluunniit ilumut inuiannik nungusaasoqarsimanersoq pillugu. Iliuutsilli siunertaa qulaajarneqartariaqarpoq, oqarpoq.
Killissamik qaangiineq sakkortooq
DR-ip podcastiliaa naapertorlugu arnat inuusuttuaqqallu 4.500-t 1970-ikkut qiteqqunnissaata tungaanut spiralilersorneqartarsimapput. Akuersisitseqqaarani spiralilersuineq ingerlanneqarsimavoq, niviarsiaqqallu ammut 13-it tikillugit ukiullit angajoqqaavi ilisimatinnagit spiralilertinneqartarsimallutik.
Suliaq Sermitsiaq.AG-mi aamma AG-mi siornatigut saqqummiunneqareerpoq.
Inuit Pisinnaatitaaffii pillugit Siunnersuisoqatigiit aamma Inuit Pisinnaatitaaffii pillugit Institutti ataatsimoorlutik kaammattuipput, isummerlutillu taama iliorsimaneq inuit pisinnaatitaaffiinik killissimanik qaangiinerusoq, mitallernerusoq inuppalaannginnerusorlu.
- Akuersisitseqqaarani kalaallit arnataannik inuusuttunik inersimasunillu aaqqissuussamik spiralilersuisoqarsimanera Siunnersuisoqatigiinni quarsaarutigeqaarput. Suliaq imaannaanngeqisutut tiguarput. Matumani pineqarput inuit pisinnaatitaaffiinni annertuumik innarliinerit annertoorujussuusinnaasut, Qivioq Løvstrøm, Inuit Pisinnaatitaaffii pillugit
Siunnersuisoqatigiinni siulittaasoq oqarpoq.
