Qitittarfimmik ammaasoqartoq

NuQi Dance Nuummiittoq qitittarfimmik ataasinngorneq 27. februar ammaalerpoq. Qitittarfimmik ammaanissami Oak Foundation Denmark aningaasaliilluni tapiissuteqarsimavoq.

Oak Foundation Denmarkip aningaasaliineratigut, NuQi Dance Nuummi qitittartut sungiusartarfissaannik 27. februar ammaasussanngorpoq.

Qitilluni sungiusartarfiit qitinnerinnarmut atussanngillat, nunatsinnili qitittartuuneq pillugu aamma isummersortarfiussallutik.

- NuQi Dance sungiusartarfiussaaq oqalliffiullunilu, nunatsinni qitittartunut ineriartortitsisussaq, NuQi Dance tusagassiorfinnut nalunaarutimini allappoq.

Ataasinngornermi matut ammarneqareerpata soqutiginnittut pisortatigoortumik ammaanersiornissamut 17. marts qaaqquneqarput.

Piumaneqarluartoq

NuQi Dancemi siulersuisuni siulittaasoq ilisimatitsivoq qitittartut sungiusartarfiannik ammaanissaq pisariaqartinneqartarsimasoq. Maannalu ammarneqalersoq nunatsinni siullersaavoq.

- Taama ittumik nunatsinni allami soqanngilaq. NuQi Dancep timi atorlugu saqqummersinnaaneq periarfissanngortippaa, tamannalu nunatsinni meeqqanut inuusuttunullu tamanut iluaqutaasariaqarpoq, NuQi Dancemi siulersuisut siulittaasuat, Peter Rex oqarpoq.

NuQi Dance nunatsinni qitittartunik katersuutsitsinissamik siunertaqarpoq, nunatsinnilu qitittartoqatigiinnik suleqateqalernissamik suliniuteqarluni.

Suleqatigiinnerit aallartereersut

Suleqatigiinnissamik isumaqatigiissutit siulliit, Inngertartunut aamma NAIP-mut isumaqatigiissutigineqareersimapput. Suleqatigiinnermi qulakkeerniarneqarpoq meeqqat inuusuttullu qitittaasinik assigiinngitsunik, pingaartumik inuit qitittaasiinik aamma nunani allani qitittaatsinik, ilinniartitsisinnaanissaaq. Soorlu kalattuut qilaatersornerlu aamma ilinniarneqarsinnaasut, NuQi Dance ilisimatitsivoq.

Qitittarfiit Godthåbshallen suleqatigalugu pilersinneqarput.

Powered by Labrador CMS