Skip to main content

Qinngorput ungdomsklubbitaalersoq

Kommuneqarfik Sermersuumi Meeqqanut Atuarfeqarnermullu Ataatsimiititap Nuup illoqarfiata immikkoortortaani, Qinngorput, ungdomsklubbeqalernissamik siunnersuut akueraa

Nuummi najukkami ataatsimiititaliami ilaasortap, Arnarissoq Fleischerip siunnersuutini tunngavilersuutigaa Qinngorpumi inuusuttunut klubbeqalernissaa pisariaqarluinnartoq Atuarfik Hans Lyngemi atuartut 500-t sinneqarmata, Nuummilu atuarfinni tallimaasuni atuartoqarnerpaalluni:

- Atuartut nukarliit Miniklubbeqarput atuartulli angajulliit ornittagaqanngillat. Qinngutsinni atuartut anginerit unnukkut atuarfiup, Brugsenip aamma Pisiffiup silataanni katersuuttarput. Aasakkut arsaattarfiup eqqaanniittarput. Qujanartumik aserorterinermik ajornartorsiuteqartoqarneranik suli tusagaqanngilagut, taamaakkaluartoq meeqqanut inuusuttunullu ornittakkamik pilersitsisoqannginnerani tamanna utaqqisariaqanngilarput​​, allappoq.

Aaqqiissutissatut siunnersuut

Meeqqanut Atuarfeqarnermullu Ingerlatsiviup illu meeqqanut qulingiluaniik 13-it tungaannut ukiulinnut klubbi aamma inuusuttunut 14-iniik 21-it tungaannut ukiulinnut klubbi sumiissanersoq isummerfigereersimavaa. Qinngorput Miniklubbeqareerpoq, meeqqallu tallimaniik arfineq-pingasut tungaannut ukiullit atuareernerup kingorna tassaniittarput.

- Meeqqanut Atuarfeqarnermullu Ingerlatsiviup siunnersuutigissavaa, Miniklubbimi inini sunngiffimmi sammisassaqartitsivimmik ammaasoqassasoq, taamaasillunilu kommune ininik inuusuttunut klubbiliornissamut aningaasaliinissamut aningaasartuutissanik sipaaruteqassalluni. Miniklubbi inuusuttunut klubbitut, junior- aamma seniorklubbitut atorneqassappat, ammasarfiit sivitsorneqassapput, inuusuttunut klubbit ammasarfii assigalugit, Kommuneqarfik Sermersuumi Meeqqanut Atuarfeqarnermullu Ingerlatsivimmit siunnersuutigineqarpoq.

Miniklubbi meeqqanut inuusuttunullu qulingiluaniit 21-it tikillugit ukiulinnut ammarneqassappat, taava ammasarfiit aamma allanngortinneqassapput. Inuusuttunut klubbit ammasarfii sapaatit akunneranut agguaqatigiissillugu 32 tiimit ammasarput, tassa ualikkut unnukkullu ammasarlutik. Atuarfik Hans Lyngemi 4. klassemiit 6. klasse ilanngullugu atuartut 172-iupput, 7. klassemiillu 10. klasse ilanngullugu atuartut 140-llutik.

- Eqqoriaanikkut nalilerneqarpoq, siunnersuut naapertorlugu sulisut 10-nik amerlineqassasut, tassami inuusuttut, inuusuttut klubbiinik atuisartuusut agguaqatigiissillugu 150-iusarmata, aningaasaqarnermut inuussutissarsiornermullu ataatsimiititamut ilisimatitsissutigineqarpoq.

Aningaasartuuteqarfiungaatsiassaaq

Meeqqat inuusuttullu utaqqilaartariaqassapput. Init pigineqareersut atorlugit inuusuttunut klubbiliornermi kommunip aningaasat 3,8 milliuunit koruunit missaanniittut atussavai, ukiumullu ingerlatsinermut akissarsiaqartitsinermullu 3,3 milliuunit koruunit aningaasartuutigineqartassallutik. Tamanna isumaqarpoq inuusuttunut klubbip aningaasalersorneqarnera 2020-mut missingersuusiornissamut isumaqatiginninniarnernut ilanngunneqassaaq.

Siunnersuut Meeqqanut Atuarfeqarnermullu Ataatsimiititaliamit augustip arfernani akuerineqarpoq, Aningaasaqarnermullu Inuussutissarsiornermullu Ataatsimiititaliamut aalajangiiffineqartussanngorlugu ingerlateqqinneqarluni.

Arsuk Kommuneqarfik Sermersooq nalliuttorsiutigivaat
Kommuneqarfik Sermersooq ukiuni qulinngortorsiorneranut atatillugu, kommunip nunaqarfii aqqaneq marluusut kaffillerfigineqarput.
Savimminernik eqqakkanik tunniussinissaq sivitsorneqarpoq
Sermersuumi Eqqakkanik tigooraavik maanna eqqakkanik savimminernik kiisalu biilinik isateriikkanik akeqanngitsumik inuussutissarsiortut igitsinissaannik neqerooruteqarpoq. Eqqakkanik tunniussinissaq...
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

Seneste Ugeavis

SENESTE NUUK - NYHEDER