meeqqat atuarfiat
Qinngasaarisarneq pillugu eqqumiitsualiat
Eqqumiitsuliat arfinillit Paamiuni meeqqat atuarfianni Tuiisami ullaaq tallimanngornermi saqqummersinneqarneri borgmester Asii Chemnitz Narupimit ammarneqarpoq. Eqqumiitsuliat qinngasaarisarnermut ikinngutigiinnermullu tunngasuupput.
Borgmester Asii Chemnitz Narupip Tuiisamilu pisortap, Marius Jeremiassen-Jakobsenip, eqqumiitsuliat assilisat katitikkat arfinillit saqqummersinneqarneranni ammaammata, meeqqat atuartorpassuit 100-nik ikinnerunngitsut klassiniit atuarfiup katersuuttarfiannut ingerlaarrapput.
Eqqumiitsuliat taakku atuarfiup qiterpiaani ersareqalutik nivigapput.
Qinngasaartinneq annernarpoq
Eqqumiitsuliat suliarineqarput eqqumiitsuliortumit Nuummi najugaqartumit, Ivínguak´ Stork Høeghimit, suliaallutillu assilisanik assinillu katitikkanik.
- Qinngasaarneqarnermi misigisat qanoq ittuunersut eqqumiitsulianni takutikkusuppara, Ivínguak’ Stork Høegh oqarpoq.
- Taamaattumik eqqumiitsulianni kammalaatigiinneq qanoq nuannertigisarnersoq ilanngullu aamma takutikkusuppara. Tassami kikkut tamarmik kammalaateqarnissamik pisariaqartitsipput.
Borgmester Asii Chemnitz Narupip (IA) qinngasaarisarnerup eqqumiitsuliallu qanoq imminnut ataqatigiisillugit takutinneqarsinnaanerat ersersikkusuppaa.
- Qinngasaarisarneq nuannarinngilluinnarpara. Inuit qinngasaarneqartilluta qamuuna assut annersinneqartarpugut nikallugalersarlutalu. Qinngasaarneqarneq inummut sequtserutaasarpoq, meeqqanut oqalugiarnermini oqarpoq.
Suliat arfinillit atuarfinni arfineq-pingasuni
Eqqumiitsuliat taakkulu aallaavigalugit atuartitsinermut atortussat aamma atorlugit qinngasaarisarneq aamma qinngasaartittarneq qimallugit oqaloqatigiissinnaaneq paaseqatigiissinnaaneq ilinniartitsissutigineqartassapput.
Kommuneqarfik Sermersuumi aturfiit arfineq-pingasuusut tamarmik eqqumiitsulianik arfinilinnik nivinngaaffigineqassapput. Aturfik Tuiisaq Paamiuniittoq tassa siullersaavoq tullinnguutissalluni Nuummi Atuarfik Samule Kleinschmidt (ASK).