Qinngasaarisarneq assigiinngissuserlu pillugit juullimi isiginnaartitsineq
Narsap atuarfiani atuartut qaammammi matumani siusinnerusukkut Narsap katersortarfiani juullimi isiginnaartitsisimapput. Isiginnaagassiami qitiutinneqarpoq juulli tassaanngitsoq akisuunik tunissutisinissaq, tassaasorli asanninnermik takutitsinissaq inuillu assigiinnginnerannik paasinninnissaq.
Juulli sivisullunilu aningaasarpassuarnik naleqartarpoq. Kikkulli tamarmik nutaajunerpaamik mobiltelefonitaarnissamut imaluunniit Bolt Lamarimeersumik nasartalimik tujuuluttaarnissamut akissaqartanngillat.
Ilaqutariit ilaanni meeqqat atornikunik atisaqartarput, anaanaallu aamma ataataat atuarfimmi aaqqissuussanut tamanut peqataasarlutik. Ilatuariinni allani anaanaasoq ataataasorluunniit ilaquttaminnik pilersuiniarlutik suliuaannarput.
Ilaquttat qanoq atugaqaraluarpataluunniit aamma juullimut tunissutissat qanoq akeqaraluarpataluunniit suut tamarmik ajungitsumik ingerlanissaat pineqarlunilu imminut tatiginissaq pineqarpoq.
Narsami atuartut juullimi isiginnaartitsineranni marluusuni taamatut oqariartuuteqartoqarpoq, Katrine Poulsenip Kommuni Kujallermit aningaasatigut ikiorserneqarluni decembarip qaammataani isiginnaartitsinissaq aaqqissuussimavaa.
-Juullimi tunissutissat pineqaratik asanninneq pineqarpoq. Meeraqarpoq suuteqarpallaaratik kaallutik innartartunik. Taakku ilaannikkooriarlutik atuaqatiminni qinngasaarneqartarput, tamannlau iliuuseqarfigissavarput, isiginnaartitsinissamik aaqqissuisimasoq suliniuteqarsimasorlu Katrine Poulsen Sermitsiaq.AG-mut oqarpoq.
Paasinninnermik nassataqassasoq
Taassuma neriuutigaa, isiginnaagassiaq aqqutigalugu ilaqutariinni assigiinngitsupilussuarnik atugaqartoqarnera paasineqassasoq.
Meeqqat sammineqartoq pillugu suliaqarsimanerminnik nuannarinnittut suliniuteqarsimasup oqaluttuaraa.
- Sammineqartoq tigulluarpaat. Meeqqat 40-ngajalluinnaat suleqataasimapput, 30-llu isiginnaagassiamik suliaqaqataasimallutik. Isiginnaagassiassap suliarineqarnerani immitsinnut paasisinnaanngorniarluta pinnguartarsimaqaagut, Katrine Poulsen oqaluttuarpoq.
Meeqqat 40-t 1. klassimiit 10. klassimut atuartut ullut 20-t missaanni juullimi isiginnaartitsinissamut sungiusarsimapput. Meeqqat oqaasssanik namminneerlutik allattuisimapput Katrine Poulsenimit isumassarsisinneqartarlutik.
Isigaannaagassiami erinarsortoqarlunilu nipilersortoqarpoq, aamma nissiaqqat meeqqat akunnerminni paaseqatigiittarnissaannut ikiuuttarsimapput. Isiginnaartitsisarfik ulikkaarlugu marloriarluni isiginnaartitsisoqarpoq.
- Isiginnaariarsimasut ilarpassuisa oqaatigaat, sammisaq pingaaruteqartoq inuunerminnit ilisarisinnaasartik, taamaammat tamatuma sammineqarnera nuannaarutiginerartarpaat, Katrine Poulsen oqarpoq.
Isiginnaartitsinermit assit amerlanerusut ilanngutassiap aallartinnerani takukkit.