Qinngasaarisarneq anigorniarlugu MIO suliniuteqartoq

- SMS-ikkut meeqqanik siunnersuisarnitsinnit nalunngilarput qinngasaaruttarneq meerarpassuit akornanni assut atugaasoq, inuunerannilu ilorrisimaarnerannut assut sunniuteqartartoq. Taamaammat nuannaarutigaarput suliniummut ataqatigissaarissagatta.
Meeqqat Illersuisuat Aaja Chemnitz Larsen oqarpoq.

Meeqqat Inuusuttullu Oqaloqatiginnittarfiat MIO 'Kammagiitta – Qinngasaarunnata'-p suliaanik ataqatigissaarisunngussaaq, tassani meeqqat meeqqanik paaqqinnittarfinniittuniit qummut 3. Klasseni atuartut kammagiilluarnermik ilinniartissavai. Siunertaavoq qinngasaaruttarnerup pinaveersaartinneqarnissaa.

MIO-p Kammagiittamik ataqatigiissaarisutut suliassaraa suliniummik malinnaanissaq, paasissutissanik katersinissaq, suliniummillu ingerlaavartumik ineriartuinissaq pitsanngorsaanissarlu.

Suliniutip eqqumaffigineqarnerulernissaa anguniarlugu MIO pilersaarpoq facebook-gruppiliornissamik, tassani meeqqanik sullissisut paasissutissanik, misilittakkaminnik qanorlu Kammagiittap meeqqanik paaqqinnittarfimmi atuartulluunniit minnerit atuartinneqarneranni atorneqarsinnaaneranut isumassarsianik pitsaasunik imminnut avitseqatigiissinnaapput.

MIO neriuppoq kommunit sulisutik suliniummut suleqataasut internetikkut inoqatinut attaveqaatinik atuisinnaalertissinnaassagaat, tamanna suliassaasa ilarissappassuk.

- Nuannaarutigeqaara uagut 'Kammagiitta – Qinngasaarunnata'-mik oqariartuutip siuaruarternerani peqataassagatta. Meeqqat ilorrissimaarnerat FN-ip meeqqat pillugit isumaqatigiissutaani pisinnaatitaaffiuvoq qitiulluinnartoq, Aaja Chemnitz oqarpoq.

-'Kammagiitta'-p meeqqat ilinniartittarpai kikkut tamarmik tusaaneqarnissaminnik ataatsimooqataanermullu akuunissamut pisinnaatitaaffeqartut. Kammagiittamit misilittakkat ilagaat, meeqqat tassaalertarmata inersimasunik qanoq imminnut pissusilersornissaanik ilinniartitsilertartut. Tamanna tupinnaannarpoq!, Meeqqat Illersuisuat oqarpoq.