Qinigassanngortittup upalungaarsimaneq pillugu oqallinnermik ujartuivoq
Nunatta Qitornaanneersoq Jens Peter Mølgaard, Nunatsinni upalungaarsimaneq pillugu oqallinnermik amigaateqarpoq. Tamatumunnga ilinniarfimmik pilersitsisoqartariaqarpoq, taanna siunnersuuteqarpoq.
Inatsisartunut qineqqusaarnermi Kalaallit Nunaanni upalungaarsimaneq pillugu oqallinneq amigaataavoq.
Jens Peter Mølgaard Nunatta Qitornaanneersoq taama isumaqarpoq.
- Isumaqarpunga pingaaruteqarluinnartoq puigorneqartoq, tassalu nunarsuarmioqataanitsinni nunarujussuarmi peqqarniissinnaaqisumi najugaqaratta, aammalu ukiuni makkunani Nunatsinni nunap sajuttarnera akulikilliartuinnarput, upalungaarsimanerup oqallisiginissaa taamaammat pingaartorujussuuvoq, taanna qineqqusaarummini allappoq.
Jens Peter Mølgaardip tamatumunnga ilinniarfeqalernissaanik siunnersuuteqarpoq.
- Naak ilaatigut Issittumi Sakkutooqarfik, qatserisartut il.il. annaassiniartarnermut sungiusarsimasut sumiiffinni assigiinngitsuni pigereeraluarigut, isumaqarpunga siunissaq ungasinnerusoq eqqarsaatingalugu partiit tamattaalluta ikioqatigiillutalu ilusilersueqatigiittariaqartugut, Jens Peter Mølgaard oqarpoq.
Taassuma Inatsisartunut qinersisoqarnissaa sioqqullugu tamanna oqaluuserineqarnissaa neriuutigaa.