Qinigassanngortittoq: Atuartut innarluutillit atugaat pitsanngorsarneqassapput
IA tunuliaqutaralugu Kommuneqarfik Sermersuumi kommunalbestyrelsemut qinigassanngortittup, Charlotte Ludvigsenip qinigaaffimmi tullermi meeqqat atuarfiini atuartut innarluutillit atugaat pitsanngorsaavigiumallugit 30 milliuunit koruuninik aningaasaliiumavoq.
Kommuneqarfik Sermersooq nunallu sinnera meeqqat atuarfianni atuartunut innarluuteqartunut pitsaanerusumik atugassaqartitsisinnaavoq. Kommunimi borgmesteri qinigassanngorteqqittorlu, Charlotte Ludvigsen (IA) taama nalunaaruteqarpoq.
- Nuummi meeqqat inuusuttullu assigiinngitsunik innarluuteqartuusut 124-upput, taakkulu siunissaat pillugit ileqqorissaarnermik aningaasaqarnermillu tunngaveqarluta aningaasaliissaagut, tusagassiorfinnut nalunaarutimini allappoq.
Nutaarsiassaqartitsivimmut nassuiaavoq kommunip inunnut innarluutilinnut sullissinera qaqugukkulluunniit pitsanngorsarneqartuarsinnaasoq. Maannakkullu meeqqat atuarfianni atuartut innarluutillit atuarnissamut ilinniarnissamullu pisinnaatitaaffiat aallaavigalugu pitsanngorsaaffigineqarnissaat piffissanngorpoq:
- Meeqqat pineqartut innarluutitik aallaavigalugit assigiinngitsunik pisariaqartitaqarput. Atuarfiit illuutaat aamma tulluarsarneqartariaqarput, taamatullu meeqqat pisariaqartitaat aallaavigalugit piffissat atuartitsiffiusut eqaannerusinnaallutik, taamaasillutik atuartitsinermit pissarsiaqarnerusinnaalersillugit, Sermitsiaq.AG-mut nassuiaavoq.
Meeqqat innarluutillit pillugit pitsanngorsaatissat 30 milliuunit koruuninik akeqassapput.
Ima atorneqassapput:
- Atuarfinni, fritidsklubbini, timersortarfinni allanilu innarluutilinnut atortut pitsaanerusut.
- Atuartut innarluuteqarnerat pissutaalluni immikkut pisariaqartitsisut atuarfinni pakkersimaarnissaannut sulisunik aalajangersimasunik ilinniartitaaneq.
- Ulloq atuarfiusartoq pisariaqartitsisunut eqaannerusoq. Ilaasa nipaannissaq, tiimit ikinnerusut pisariaqartippaat allallu timi aalatinnerussallugu pisariaqartillugu. Tamakku pillugit sinaakkusiisinnaavugut.
- Meeqqat ataasiakkaat atugaat pillugit angajoqqaanik oqaloqateqarnerunissaq, taamaalilluni pitsaasumik atuarnissamut periarfissinneqarneq.
- Taama aningaasaliineq meeqqat siunissaannut aningaasaliineruvoq, peqatitik assigalugit ilinniaqqinnissamut periarfissaqarnerulissammata. Siunissamut aningaasaliineruvoq, aamma kommunitsinni kaaviiaartitat 2 milliardiummata aningaasaliinissamut aningaasat nassaarisinnaassagigut qularinngilara, Charlotte Ludvigsen oqarpoq.
Sermitsiaq.AG nassuiaavoq Nuummi pitsanngorsaanissamik pisariaqartitsisoqarnerusoq, kommuni tamakkerlugu illoqarfissuarmi meeqqat innarluuteqartut amerlanerpaammata. Illoqarfinni allani atuarfiusuni specialklasseqareerpoq meeqqat pisariaqartitsinerat aallaavigalugu atuartitsiffiusunik, nassuiaavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...