valg
Qinersiviit matupput: Maanna kisitsisoqarpoq
Kikkut 31-t sinniisuussappat? Tamanna nunatsinni qinersisartut aalajangeqqammerpaat, kisianni pissangalluta tiimerpassuarni qinersinernik kisitsisoqarnerani tamatuma akissutissaa utaqqisariaqarparput. Nuummi qineqqusaartuni isumalluarneq annertuvoq
Nalunaaqutaq 20.00 eqqoqqinnaarlugu nunatsinni taasisitsiviit annersaat – Nuuk, nunatsinni qinersisinnaasut pingajorarterutaasa missaasa najugaqarfigisaanni matuvoq.
Borgmester Asii Chemnitz Narup Inuit Ataqatigiinnersoq malillugu qinersiartortut siorna marsimut sanilliullugu amerlanerulaalaarput.
Taanna aamma qinersisut kingulliit ilaanniilluni qinersivoq. Neriuutigaalu parteeqatini, Inuit Ataqatigiit siulittaasuat Sara Olsvig, qinerneqarluarumaartoq.
- Ilimagivara qinersisartorpassuit siulittaasorput tapersersorsimassangaat. Qinerneqarluartariaqarsoraarami.
Marloriaatinngortitsineq?
Qineqqusaartut Katuami ulloq naallugu takussaapput. Qiviartarlutik – soorlu Peter Plysip igutsaap tungusunnitsuutaa takugaangamiuk isikkorisartagaa assigalugu qinersiartortut isaasut aniasullu qimerloortarpaat.
Demokraatit siulittaasuat, Andreas Uldum, taakkua ilagaat, angusarissaarnissaminik neriuuteqartoq. Taassuma takorloorpaa sisamanik ilaasortaatitaqalernissaq:
- Soormimi? Qineqqusaartitagut qineqqusaarnermi qineqqusaarluaqaat. Inatsisartuni ilaasortaatitagut marloriaatinngortikkutsigit (marlunniit sisamanut, aaqq.), taava Naalagaaffeqatigiinnerup oqaluttuarisaanerani partiimut aatsaat taamatut marloriaatinngortitsitsilluni iluatsitsiffiussaaq, neriuuteqarluni taama nalunaarpoq.
Unnuarsiornialersut
Nuummi qinersivimmi aqutsisoq Karno Lynge kingullerpaalluni qinersivoq. Isersimasunullu tamanna quiatsaffiuvoq aamma. Uisakajaallatsiarnerminimi pappiliaq taasivissani tigunagu qinersivissamut iseraluarpoq.
Kukkunerli pilertortumik aaqqiivigineqarpoq.
Qinersinermik ataatsimiisitaliap kisitsinerit unnuaru aatsaat piareerumaartut – pingasut sisamalluunniit missaani.