Qinersisoqarnissaa pissutigalugu naalagaaffeqatigiinneq pillugu siusinaarluni ataatsimiinneq
Naalagaaffeqatigiinneq pillugu ukiumoortumi ataatsimiinneq apriilip 11-anni pissaaq
Nalaagaaffeqatigiinneq pillugu ataatsimiinneq ukioq manna apriilip 11-anni pissaaq – amerlanertigut juunimi pisararluarpoq.
Ataatsimiinneq Danmarkip, Savalimmiut aamma Kalaallit Nunaata akornanni kaajallaasillugu ingerlanneqartarpoq, ukioq mannalu Kim Kielsen qaaqqusisuussaaq. Taamaattumik ministeriuneq Lars Løkke Rasmussen aamma lagmand Aksel V. Johannesen Ilulissanut qaaqquai.
- Naalagaaffeqatigiinneq pillugu ukioq manna ataatsimiinnissamut tikeraartitsisuunissara qilanaareqaara, tassani Lagmandi Ministeriunerlu peqatigigalugit apeqqutit assigiinngitsut naalagaaffeqatigiinnermi ataatsimoorfigisagut akunnitsinni oqaloqatigiissutigissavagut, Kim Kielsen tusagassiuutinut nalunaarummi allappoq.
Naalagaaffeqatigiinneq pillugu ataatsimiinnerup ukioq manna siusinaartumik pinissaa, folketingimut qinersinerup kingusinnerpaamik juunip 17-anni pisussaaneranik pissuteqarpoq. Lars Løkke Rasmussenip poorskip kingorna qinersisoqarnissaanik nalunaaruteqarnissaa, Christiansborgimi torsuusani oqaluuserineqarpoq. Naalagaaffeqatigiinneq pillugu sisamanngorpat ataatsimiittoqarnissaanut ulloritinneqartoq taamatut naliliisoqarneranut tulluarpoq.
Naalagaaffeqatigiinneq pillugu ataatsimiinneq Qeqertarsuup Tunuani angalanermik aamma nunaqarfimmut Saqqamut tikeraarnermik naggaserneqassaaq, tassani nunaqarfimmi aqutsisut naapinneqassapput.
Naalagaaffeqatigiinneq pillugu ataatsimiinnerit persuarsiunngitsumik naalakkersuisut siuttuinit ingerlanneqartarput. Naalagaaffeqatigiinneq pillugu ataatsimiinnernut kingullernut atatillugu politikkikkut suliniutit annertuut saqqummiunneqarnikuupput. Ilulissani aamma Nuummi mittarfinnut danskit peqataanissaannut siorna oqaluuserineqarput. Ukiup siuliani amerikamiut sakkutooqarfigisimasaanni iluarsaassinernut tunngavoq.
Naalagaaffeqatigiinneq pillugu ataatsimiinneq kingulleq Savalimmiuni juunimi 2018-imi pivoq.