Qinersisoqalernerani salluliuut: Tusagassiuinermut tunngasunik aalajangiisartut isumaliutigaakka
Múte B. Egedep, IA-mut aamma Naalakkersuisunut siulittaasup, Danmarkimi Tusagassiuinermut tunngasunik aalajangiisartunut TV2 qularnanngitsumik suliakkiutiginiarpaa. Naalakkersuisut siulittaasuat isumaqarpoq, nutaarsiassaqartitsivik taanna allaaserisaq ilumuunngitsoq, Inatsisartunut qinersinissaq sioqqullugu TV2-mit saqqummiunneqartoq pillugu nassuiaanissaminut ajornartorsiuteqartoq.
Nutaarsiassaqartitsinermi aaqqissuisup Ulla Østergaardip TV2-mi atorfimminit soraarnini qanittukkut nalunaarutigaa. Tv-qarfimmulli sumit tamaanngaanniit isornartorsiuineq ingerlaannarmat utoqqatsertoqarusukkunaraluarpoq, nassuerutigiumanaguli oqaluttuamut ilumuunngitsumut kina tusarfiusimanersoq. Allaaserisami Múte B. Egede unnerluutigineqarpoq, aningaasarsiornikkut imminut iluaquserniarluni attuumassuteqarpallaarnini soqutiginagu politikikkut aalajangiinerni peqataasarsimanerarlugu, aviisi AG allappoq.
Oqaluttuaq tamanna qinersinissaq ullualunnik sioqqullugu saqqummiunneqarpoq, saqqummiunneqarnissaalu Ulla Østergaardimit ilungersuutigineqarluni, naak oqaluttuaq piviusumik tunngaveqanngitsoq pillugu Múte B. Egede oqaaseqartinneqarnissaminut periarfissinneqarsimanngikkaluartoq.
- Pineqartup Danmarkimi Tusagassiuinermut tunngasunik Aalajangiisartunut suliassanngortinnissaa isumaliutigaara. Isumaqarama unnerluutiginninnerit arlallit TV2-mit suli nassuiaatissaqartinneqanngitsut. Sooq oqaluttuaq ilanngunneqarpa, naak ilaatigut paasissutissat ilumoortuunerat apeqquserlugu Transparency Greenlandimit mianersoqqusisoqaraluartoq. Mianersornissaq sumiikkami?
- Ilumuunnginneraanissama tungaanut piffissaq sivisooq aamma atortariaqarsimavara. Allaannginnami qarmamut oqalulluni. Suut tamarmik parnaarneqarsimasutut misinnaramik. Oqaloqatigiittoqannginnami, naak allaaserisaq kukkusuugaluartoq. Tusagassiorfinnut allanut saaffiginninniarlunga aatsaat oqaaseqarama iliuuseqartoqarniarsarilerpoq, Múte B. Egede oqarpoq, taanna TV2-mit sms-inik mailinilluunniit aamma tigusaqanngilaq, naak IA-p siulittaasuanik oqaaseqartitsiniarlutik tamakkuninnga nassitsisimallutik oqaatigigaluaraat.
Allaaserisaq tamaat uani AG-mi atuaruk: