qinersisinnaaneq
Qinersisinnaanerup killilerniarneqarnera Demokraatit naleqqutinnginnerarpaat
Nuuttartut qinersisinnaanerisa Siumup killiliilluni siunnersuuteqarnerata kingorna Justus Hansen sakkortuumik isornartorsiuivoq
Justus Hansen (D) qinersisarnermut inatsisip allanngortinneqarnissaanut Siumup siunnersuutaanut isornartorsiuivoq.
Nunasisut ukiut marluk arfineq-marlulluunniit qaangiukkaangata qinersisinnaanngornissaat Siumumit kissaatigineqarpoq.
- Siunnersuut kikkut tamat oqartussaaqataanerannut naapertuutinngilaq qujatsuinnerullunilu, Justus Hansen tusagassiuutinut nalunaarummi allappoq.
- Inuit akileraarutaat perusuppaat oqartussaaqataatikkumanagilli. Kusananngilaq aamma pissuserissaarnissamut isumat uniorlugit iliorneruvoq aamma Demokraatini neriuutigeqaarput uanguinnaanngitsoq eqqarsaatit taamaattut itigartilluinnarumaaraat. Nunami demokratiskiusumi taamatut eqqarsartoqarsinnaanngilaq.
Aamma atuaruk: Siumut: Nuuttunut qinersisinnaatitaaneq killeqartinneqarli
Siumup aamma nuna qinersisarfinnut arlalinnut avinneqarnissaa kissaatigaa, kommunit killingi malillugit. Siunnersuut malillugu Sermersooq arfinilinnik qinigaatitaqassaaq, kommunit sinnerit sisamanik.
Siunnersuullu taanna aamma Justus Hansenip akuersaanngilaa.
- 1. januaari 2017 aallarnerfigalugu Kommuneqarfik Sermersuumi najugaqarput inuit 22.673-t. Siumup takoroorpaa inuit taakku arfinilinnik qinigaatitaqarsinnaassasut. Kommune Qeqertalinngortussaq inoqarpoq 6.500-nik. Tassani sisamat qinigaasinnaanngortinniarneqarput. Qanoq ililluni Siumup ilumoorluni isumaqarsinnaava taamatut ilaasortanik agguaariaaseqarnissaq kikkut tamat oqartussaaqataanerannut naapertuusoq?, taanna aperivoq.
Siunnersuut apeqquteqaat tunngavigalugu siunnersuummi novembarip 9-anni oqallisigineqassaaq.