Qinersisartut qarasaasiatigut allakkatigut qinersinermi isertuussisussaaneq akisussaaffigissavaat

Naalakkersuisut nassuerutigaat qarasaasiatigut allakkatigut qinersinermi peqquserluttoqarsinnaasoq - takkullunili taasiartornermi aamma taamaaliortoqarsinnaavoq

Qarasaasiatigut taasisinnaanermik aaqqissuussaq aqqutigalugu ilaatigut kilisaatini inuttat, ilinniagaqartut inuillu innarluutillit taasisinnaanerat ajornannginnerulissaaq. Naalakkersuisummi siunnersuutigisimavaat NemID-mik atuilluni qarasaasiatigut taasisoqarsinnaanngussasoq.

Taamaalilluni Danmarkimi isertortumik taasiniaraanni nakkutiginnittarnissamik piumasaqaat assilillugu atorsimasaq atorunnaarsinneqassaaq. Angerlarsimffimmimi taasiffissaq nammineerluni immersoriarlugu nassiunneqarnissaa inerteqqutaavoq.

Periarfissarli taanna, Danmark Islandilu eqqaassanngikkaanni, nunani avannnarlerni allani atugaavoq. Naalakkersuisulli tamanna atornagu qarasaasiatigut taasisinnaaneq toqqaannartumik atuutsikkusuppaat.

Qinersisartoq akisussaaffeqarnerulissasoq

Tassa qinersisartup nammineerluni isertortumik taasinissani taasinermilu allat isiginnaannginnissaat akisussaaffigilissavaa.

- Naalakkersuisut isumaqarput, isertuussinissamut politikkikkut maannamut isummertarnermut peqataatitsinerusumik politikkikkut akisussaafeqalernikkut (aamma Danmarkimit assilisanik) Kalaallit Nunaat ilaatigut Nunani avannarlerni nunanut amerlanernut naapertuunnerusumik ingerlatsilissasoq, ilaatigullu Inatsisartunut qinersinermi ajornannginnerusumik taasisoqarsinnaanera qulakkeerneqassasoq.

Aaqqissuussisoqassaaq qarasaasiatigut taasanik tigusisut taasinerup suminngaanneerneranik takunnissinnaajunnaarsillugit.

- Kinaassutsimik isertuussinissaq qulakkeerneqassaaq qarasaasiatigut taasinerit allakkat puussaannut (paasiuminaallisakkanut) ”poortortarnerisigut”, tassa ornigulluni taasisarnermi ullumikkut pisartut assigalugit, taamanna nassuiaatini allassimavoq.

Naalakkersuisut qarasaasiatigut taasinermi peqquserluttoqarsinnaanera eqqumaffigivaat; ullumikkulli aaqqissuussaq taamaatillugu aamma peqquserluttoqarsinnaavoq.

- Ornigulluni taasinermi qarasaasiatigullu taasinermi peqquserloriaatsit assigiinngitsuupput, taasinernili marluusuni taakkuanani peqquserluttoqarsinnaavoq.

Powered by Labrador CMS