Qinersisartut isumaat: Sakkutuujusussaatitaanermut inuusuttut piareersimasut
Sakkutooqarfiit amerlanerit aamma sakkutuut amerlanerusut nunatsinniilersinnaanerat nunatsinnit folketingimut qineqqusaartut oqallissutigingaatsiarpaat. Qinersisartut inuusuttut isumaqarput sakkutuujusussaatitaaneq aqqutissiuusseqataasinnaasoq, inuusuttullu pissusissamik malinnilluarnerulernissaannut atorluarsinnaalluni.
Sillimaniarnermut politikki aamma illersornissaq Folketingimut qinersinissamut qineqqusaartut oqallisigingaatsiarpaat. Nunatsinni sakkutooqarfiit amerlanerulissanersut, sakkutuut amerlanerulissanersut nunattalu qanoq iluaqutigissaneraa qanorluunniit ajoqutigisinnaaneraa, qineqqusaartut oqaluuseringaatsiarpaat.
Qinersisartulli inuusuttut qanoq isumaqarpat sakkutuujusussaatitaanermut? Ilisimatusarfimmi ilinniartut Sermitsiaq.AG-p aperai.
Amerlanerit akuersipput
Aperineqartut amerlanerit nunatsinni sakkutooqarfiit amerlineqarnissaannut akuersissagunarlutik oqarput, sakkutuujusussaatitaanerlu iluaqutissartaqartutut aamma taallugu:
- Nunatsinni sakkutooqarfiit amerlineqarnissaat imaluunniit sakkutuut amerlanerulernissaat soorunami kinguneqartussaavoq. Isumaqarpunga apeqqut taanna ukiut arlallit qaangiuppata apeqqutigineqarsinnaasoq, maannakkullu oqaluuserineqarnissaa tulluanngitsoq. Isumaqarpunga ajornartorsiutit allat sammissallugit maanna pingaaruteqarnerusoq. Soorlu peqqinnissaqarfik kiisalu meeqqat inuusuttullu atugaat sammissallugit pingaaruteqarnerupput, Maannguaq Berthelsen, erhvervsøkonomimi ilinniartoq oqarpoq.
- Nunatsinni sakkutooqarfiit amerlineqarnissaat amerlanerusunilluunniit sakkutooqalernissaq akuerisinnaavara nunatta iluaqutigissappagu. Soorlu aningaasaqarnikkut iluaqutigineqarsinnaappat akuerisinnaavara, tusagassiortunngorniaq Maasi Brøns Chemnitz oqarpoq.
- Sakkutuujusussaatitaaneq nunatsinnut eqqunneqassava?
- Naluara. Immaqami iluaqutissartaqarpoq. Ilisimavarpummi inuusuttorpassuit sussanerlutik maanna nalugaat. Danmarkimi nunatsinnilu ikinngutikka oqaluttuartarneri malillugit paasivara sakkutuujusussaatitaaneq imaluunniit sakkutooqarnerup iluani ilinniartitaaneq pissarsinartorujussuuvoq. Sakkutuujusussaatitaanerup iluani ilinniarnermi inuunerminni sorusunnerlutik paasisimavaat, oqarpoq.
- Amerlanerusunik sakkutooqarnissaq ajunngilaq, sillimaniarnissarmi pingaaruteqarpoq, socialrådgiverinngorniartoq Naasunnguaq Ignatiussen Streymoy oqarpoq.
- Sakkutuujusussaatitaaneq nunatsinnut eqqunneqassava?
- Isumassarsiatsialaasinnaasoraara. Inuusuttummi amerlasuut maanna pissusissanik malinninnissamut ilinniarnissamik pisariaqartitsipput. Inuusuttut amerlalluinnartut sunngorusunnerminnik suli qulartut tusartarpagut, sakkutuujusussaatitaanerup iluani ilinniarsinnaanerat aamma perorsaataassaaq, oqarpoq.
- Sakkutooqarfiit amerlanerusut sakkutuulluunniit amerlanerusut akuerisinnaavakka. Takoreerparpummi Ukrainemi aamma Ruslandimi susoqartoq. Isumaqarpunga sakkutooqarnerulernissaq, naalagaaffiullu killeqarfiinik nakkutilliisoqarneq inissaminiippoq, Ilisimatusarfimmi erhvervsøkonomimi ilinniartoq, Runo Fencker-Noahsen oqarpoq.
- Sakkutuujusussaatitaaneq nunatsinnut eqqunneqassava?
- Naluara sakkutuujusussaatitaaneq atuutilerneqarnissaa qanoq isumaqarfiginerlugu. Immaqa periarfissatut piukkunnarneruvoq. Eqqaamasakka malillugit misilitsissinnaanerit nunatsinni atorunnaarsinneqarnikuupput. Isumaqarpungali sakkutuunngorniarneq aamma pissarsinartuusinnaasoq. Sunaluunniit atuakkatigut ilinniarnikkulluunniit ilikkarneqartuaannanngilaq, aamma sakkutuujunikkut ileqqut pitsaasut ilikkarneqarsinnaapput, tamakkulu siunissami naleqartorujussuusinnaapput, oqarpoq.