Skip to main content

Qinersisartunit soqutigineqarneq Partii Naleqqamut unammillernartoq

Partii Naleqqamut ilaasortanngorusulluni soqutiginninneq, sineriammi qinersisartut akornanni ima annertutigilersimavoq, allaat partiip aaqqissuussaanera allanngortinneqartariaqarluni.

Pele Broberg aamma Jens Napãtôk facebookikkut eqeersimaartumik saqqummiussianerinni siuttuupput, ilaatigut videokkut partiip politikkia, pingaartumik ulluinnarni inuuniarnikkut atukkat pillugit saqqummiussisarlutik aamma aalajangiinerminnut tunngaviusumik nassuiaasarlutik saqqummiussisarmata, partii allannguiniarluni suliaqarpoq, Siumukkutut IA-kkutullu parteerujussuanngorsinnaallutik.

Nammineq saaffiginnilluni partiillu nittartagaatigut ilaasortanngorniarlutik saaffiginnittut imaaginnavipput, Pele Broberg partiip allatsertaava nutaaq, siusinnerusukkut Siumumi allataasimasoq Mikael Petersen, siulersuisuunernit piginnaatinneqarluni partiimi atugassarititaasussanik nutaanik suliaqartoq peqatigalugu ilisimatitsivoq.

Najukkani immikkoortortaqarfiit nutaat 20-t

- Piffissami kingullermi ileqqoreqqusat partiimilu atortut assigiinngitsut illoqarfinnut nunaqarfinnullu 20-nut nassiussuussimavavut, illoqarfinni nunaqarfinnilu pineqartuni qinersisartut Partii Naleqqamut ilaasortanngornissamik soqutiginnittut najukkamilu partiip immikkoortortaqarfissaanik aallartitserusuttut nassiussiffigineqarsimallutik, Pele Broberg Sermitsiaq.AG-mut ilisimatitsivoq.

Illuatungiliuttut partiiannut soqutiginnittoqarnerujussuata malitsigisaanik, immikkoortortaqarfiit atuutereersut aaqqissuussaanerisa qulakkeerneqarnissaat pisariaqarsimavoq, taamaalilluik Inatsisartunut, kommuninut nunaqarfinnilu aqutsisunut tullissaanik qinersisoqalerpat saqqumilaarneruniassammata.

- Aaqqissuussaaneq 30-t missaannik immikkoortortaqarfeqartoq, partiit allat aqqusaarsimasaat assigalugu unammillernartussaavoq, taamaammat najukkami oqartussaaqataaneq nukittorsassagutsigu naleqqussartariaqarpugut, Pele Broberg oqarpoq.

Isummernissamut tunngavissiaq piareeqqasoq

Partiip ileqqorequsassaanut isummernissamut tunngavissiaq oqallisigineqarnissaminut piareeqqavoq, partiillu nuna tamakkerlugu ataatsimeersuarnerani akuerineqarnissamut piareeqqalluni.

- Nuna tamakkerlugu ataatsimeersuartarnitta aaqqissugaanerata siunissami aalajangersimasumik iluseqarnissaa atuutsilerusupparput. Taamaammat nunap immikkoortui/illoqarfiit nunaqarfiilluunniit immikkoortortaqarfittallit naapertorlugit aaqqissuussisariaqarsinnaavugut, tamatumalu malitsigisaanik najukkani immikkoortortaqarfiit amerlassusaat allanngortillutigu, Pele Broberg nassuiaavoq.

Taassuma ilisimatitsissutigaa, internetsi najukkamiluunnii immikkoortortaqarfik aqqutigalugit partiimut ilaasortanngorniarluni nalunaartoqarsinnaasoq.

- Taamaammat paatsoornerusarpoq, naatsorsuutivut misissorlugit isumaqartoqaraangat ilaasortanit killilimmik ilaasortaanermut akiliuteqartoqartartoq. Najukkani immikkoortortaqarfiit uagut akuliuffiginngisatsinnik namminneq naatsorsuusiortarput, taamaammat naatsorsuutitsinni takuneqarsinnaasartunit amerlanerusunik ilaasortaqarpugut, Pele Broberg partiip najukkani immikkoortortaqarfii ilaasortaanermut partiit allat assigalugit qullersaqarfimmut akiliuteqarneq ajortut pillugit erseqqissaasoq oqarpoq.

Assersuutit

Pele Brobergip Partii Naleqqamut soqutiginnikkiartuinnartoqarneranut assersuutitut taavaa: inuk ataaseq nittartakkakkut qullersaqarfimmut ilaasortanngorniarpoq. Qullersaqarfik kingusinnerusukkut nunaqarfimmit inunnit arfineq-marlunnit ilaasortanngorusuttunik saaffigineqarsimasoq. 

- Taamatut pisoqarmat, taakku kaammattorsimavavut imminnut naapeqatigiillutik immikkoortortaqarfissamik nutaamik pilersitseqqullugit.

Assersuut alla tassaavoq, nunaqarfimmi allami inuit tallimat immikkoortortaqarfimmik pilersitserusunnatik qullersaqarfimmi ilaasortaarusuttut.

- Taakku kommuniminni najukkami immikkoortortaqarfimmit qaninnermit isumagineqarnissaat sulissutigaarput, Pele Broberg aaqqissuussamik suliaqarneq, ileqqoreqqusassanik ukiamut nuna tamakkerlugu ataatsimiinnermi amerlanerussuteqartunit akuersaartinniagassanik inerneqartussat naammassiniarneqarnerisa annertuneranik pisariuneranillu nassueruteqartoq oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER