Skip to main content

Qinersisartunik ataatsimiisitsinerit aallarnerlugit kujataani oqallittoqarpoq

KNR TV-p qinersisartunik ataatsimiisitsilluni qineqqusaartunik oqallitsitsineri ippassaq aallartipput. Kuannersuit pillugit paasititsiniaanerunerit, aqquserngit iluarsartuunnissaat, inissiat utoqqarnullu ikiortit innuttaasunit pitsanngorsagassatut kissaatigineqarput.

Kommuninut 6. april qinersissaagut. Kommune Kujallermi kommunalbestyrelsemut qinigassanngortitaqartut partiit pingasuupput. Atassut, Siumut aamma Inuit Ataqatigiit katillugit 39-inik qinigassanngortitaqarlutik sassarput.

KNR TV-kkut oqallitsitsinermi siullermi innuttaasut apeqqutaat aallaavigalugit oqallittoqarpoq, Qaqortumiit toqqaannartumik aallakaatinneqartumi.

Sofie Kielsen Qaqortumeersup paaserusuppaa partiit qanoq iliorniarnersut Kuannersuit pillugit paasititsiniaanerunissaq pillugu.

Taasititsineq paasititsiniaanerlu

Partiit sassartitaanni oqallinnermi peqataasut pingasut akornanni ersarilluinnartumik taanna akineqarpoq: Uraanimut naamik.

- Siumut ilumini marlunnik immikkoortoqarpoq. Uranimut naaggaartut. Aamma Kuannersuarni aatsitassarsiorfiup inatsit malillugu ingerlanneqarsinnaappat akuersaartut. Uanga nammineerlunga uranimut naaggaarpunga, Benjamin Kielsen, S, oqarpoqa nangillunilu:

- Nuna tamakkerlugu politikerit taakkuupput paasititsiniaanissamik suliaqartussat. Soorunami akisussaaffimmik tiguseqataassaanga oqallitsitsinissat naammaginissaat pillugu, oqarpoq.

- Uagut nalorninngilagut. Inuk qitiutillugu sulissagutta taasititsisariaqarpugut innuttaasut Kuannersuarnut isummernerat sumiinnersoq paasiniarlugu. Taakkunani paasititsiniaanerit avaqqunneqaannarsinnaanngillat, taasititsineq ilisimasat tunngavigalugit pissappat, Jens Adolfsen Geråe, Atassummeersoq oqarpoq.

- Uagut ersarilluinnartumik oqassaagut, naaggaarpugut. Minnerpaamik innuttaasunik oqallitsitsisoqartariaqarpoq aamma minnerpaamik innuttaasut isumaannik taasititsisoqartariaqarpoq, Moritz Karlsen, IA, oqarpoq.

Aqquserngit, inissiat angerlarsimaffinnilu ikiortit

Innuttaasut arlallit paaserusuppaat utoqqarnut ikiorteqartitsinermut pissutsit qanoq iluarsineqarniarnersut. Hans Lothsen Semsen, Nanortalimmeersoq innarluuteqarpoq 70-illu sinnerlugit ukioqarluni. Taassuma oqaluttuaraa angerlarsimaffimmi ikiorti unissimasoq.

Partiit tassunga tunngatillugu isumaqatigiingaatsiarput. Pisariaqartitsisut angerlarsimaffimmi ikiorteqassapput.

- Kommunimi allannguerusulluta sassarpugut. Utoqqaat pisinnaanikitsut inuillu innarluutillit ikiorteqartinnissaat, kiisalu isumaginninnermi sullissineq pitsaanerusoq suliassani pingaarnertut ilaanni inissisimapput issiavimmut ingikkutta, Stine Egede, IA oqarpoq.

Atassut assingusumik aamma isummerpoq.

- Angerlarsimaffimmi ikiortinik qaqugukkut pisariaqartitsisoqarneranik atuuttussanik peqareerpugut. Innuttaasut pisariaqartitsinerusut ikiorneqassapput. Nammineersinnaanerusulli nammineerfigisinnaasaminni namminiissapput, soorunamilu suliassani ikiortariaqarfinni ikiorteqartassallutik. Suliaq taanna aallartereerparput, Karla Egede Bisgaard, Siumut, nassuiaavoq.

Kommunip tikikkuminartoq

Inuit Ataqatigiit iluarsisassanut tulleriaarinissamut nalilersueqqissaarusupput, sumiiffiit pisariaqartitsinerpaat aallartiffissat paasiumallugit. Tassani assersuutigalugu aqquserngit, inissiat iluarsartuussinerillu pineqarlutik.

Atassut inuk qitiutillugu sassarpoq. Henrik Ottosen taamaammat isumaqarpoq ineriartorneq illoqarfimmiugaluarpat nunaqarfimmiugaluarpalluunniit ataatsimut assigiimmik ingerlassasoq.

Siumumit erseqqissarneqarpoq allorfik killiffigisaq aallaavigalugu ineriartornerup nangeqqinneqarnissaa pisariaqartoq.

- Isumaqarpunga Namminersorlutik Oqartussat sanaartugassanut aningaasaliissutaat 1,2 milliardit koruuniusut kommuninut nuunneqartariaqartut. Pisariaqartitsineq sumiinnersoq kommunini ilisimaneruarput, nalilersinnaanerullugulu sumi sanaartortoqassanersoq. Akisussaaffik tigutigu, aningaasartaalu, sanaartorneq taama eqaallisarneqarsinnaavoq, Moritz Karlsen, IA oqarpoq.

Kommune Kujalleq tikikkuminarsarusullugu inissialiortoqarnissaa, meeqqerivinni atuarfinnilu pitsanngorsaasoqarnissaa partiinit isumaqatigiissutigineqarpoq.

Kommune Kujallermi innuttaasunut ataatsimiisitsinerup aappaa ualimut nalunaaqutaq 15.00 toqqaannartumik aallakaatinneqassaaq. Qaqortup timersortarfissuani isiginnaariat 80-it isersinnaasut ilisimatitsissutigineqarpoq, katersuussinnaanermut killilersuutit malinneqarmata.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER