Qinersisarneq pillugu inatsit nutaaq tusarniutigineqarpoq: Qarasaasiakkut allakkatigut qinersisarneq atulersinneqassaaq
Kalaallit qinersinerup nalaani nunatta avataaniittut qarasaasiakkut allakkatigut qinersisalernissaannut, Naalakkersuisut anguniagaqarput. Qarasaasiakkut allakkatigut qinersisinnaaneq kingusinnerpaamik qinersinermi 2022-mi atulereersimassaaq.
Inatsisartunut qinersisoqartussaatillugu kalaallit nunatta avataaniittut qaraasiakkut allakkatigut qinersisinnaalertussanngorput.
Inatsisartunut qinersisarneq pillugu inatsit nutaaq 2020-mi atuutilertussatut siunnersuutigineqartoq maanna tusarniutigineqalerpoq.
- Qarasaasiatigut allakkatigut taasisinnaanissamut periaatsip sapinngisamik piaarnerpaamik atorneqarsinnaalernissaa eqqarsaataavoq. Kingusinnerpaamik 2022-mi qarasaasiatigut
allakkatigut taasisoqarsinnaalernissaa anguniagaavoq, siunnersuummi 2020-mi atuutilertussami allassimavoq.
Allat aamma periarfissaqassapput
Inatsisartunulli qinersinermi innuttaasuni eqimattat aamma inatsit nutaaq iluaqutigisinnaavaat.
- Pingaartumik kilisaatini inuttat piffissaq qineqqusaarfiusoq tamaat imaaniissinnaanerat, Naalakkersuisut isiginiarpaat. Taamaattumik qinersisartut taakkua – qinersisarnermut inatsimmi atuuttumi – qinersinermi taasinissamut periarfissaqartussaanngillat.
- Qinersisartut allat atuisinnaalersitsinerup annertusititsinermik iluaquserneqarsinnaasut tassaapput inuit allakkisartunut nalinginnaasunut sanilliullugu avingarusimasumiittut
imaluunniit avingarusimasumi najugaqartut. Tamatuma saniatigut innarluutillit assigiinngitsut aamma atuisinnaalersitsinerup annertusitinneqarnera, soorlu internettikkut qarasaasiakkut
taasinissamut periarfissaqarnerup oqaatigineqarnera, annertuumik iluaqutigisinnaavaat, inatsisissatut siunnersuutip nassuiaataani allassimavoq.
Inatsisartunut qinersinermut inatsit atuuttoq naapertorlugu, Kalaallit Nunaanni qinersinermi taaseqataaniartut allakkatigut qinersisinnaapput, tamannalu pissaaq sumiiffigisami oqartussaqarfimmi.
Atuisinnaalersitsineruneq
Danmarkimi qarasaasiakkut allakkatigut qinersisarneq atulersinneqarsimanngilaq. Taamaattoq Naalakkersuisut nunat avannarliit allat, soorlu Norge aamma Åland isumassarsiorfigisimavaat.
Taama atulersitsinermi atuisinnaanerulersitsinissaq Naalakkersuisut anguniarpaat.
- Tamannalu atuisinnaalersitsinerulernissaq, qinersisartut siunissami internettikkut qarasaasiakkut allakkatigut taasisinnaalersinneqarsinnaanissaannut Naalakkersuisut siunertaraat.
Aningaasaqarneq
Naalakkersuisut naatsorsorpaat atortorissaarutit atulersinneqartariaqartussat ukiut pingasut sisamallu akornanni 2 milliuunit koruunit pisariaqartinneqassasut. 2020-mut aningaasanut inatsisikkut qarasaasiatigut allakkatigut taasisinnaalernerup
ineriartortinneqarnerata ingerlanneqarneratalu aqunneqarnissaanut suliarineqartarnissaanullu naammattumik allaffissornikkut piginnaasaqartoqarnissaa aamma qularnaarneqareerpoq.
- Malittarisassatigut tunngavigisat nutarterneqarnerata pitsanngorsarneqarneratalu siunnersuutip pisortanut allaffissornikkut oqilisaassinissaa naatsorsuutigineqarpoq. Qarasaasiatigut
allakkatigut taasisinnaalernermut ikaarsaariarnikkut allakkatigullu taasinerit qitiusumik kisinneqartalernerisigut kommunit allaffissornikkut aamma aningaasatigut oqilisaanneqarnissaat naatsorsuutigineqarpoq, allassimavoq.
Siunnersuummut tusarniaaneq januaarip 31-ani 2020-imi killeqarpoq.