Qinersisarneq pillugu inatsit nutaaq suliarineqartoq

Qinersisarneq pillugu inatsimmut nutaamut siunnersuummik Naalakkersuisut 2020-imi upernaakkut ataatsimiittoqarneranik saqqummiussiniarput. Bentiaraq Ottosenip (A) siunnersuutaanut akissuteqaammi tamanna atuarneqarsinnaavoq.

Atassummi politikerip qinersisarnermut inatsisip allanngorneqarnissaa siunnersuutigaa, taamaalilluni partiit qinersinerup siuliani qinigaatitaqartut tulliani qinersinissamut atsiornernik katerseqqaaratik qinigassanngortitsinnaaniassammata. Ullumikkut partii qinigassanngortitsiniaruni ilaasortaatitaqaqqaartariaqarpoq. Qinigaaffimmi kingullermi Atassut tamatuminnga aalajangersakkamit eqqorneqarpoq, Inatsisartunut ilaasortaatitaat marluk Siumumut nuummata.

Naalakkersuisut siunnersuut tunngaviusumik akuersaarpaat, kisianni qinersisarnermut inatsit 1996-meersoq nalilersuleruttornerarpaat.

- Qinersisarneq pillugu inatsisip nutaap 2019-imi aasaanerani tamanut tusarniaassutiginissaa, qinersisarnerlu pillugu inatsisissap 2020-mi upernaakkut Inatsisartunut saqqummiunneqarnissaa Naalakkersuisut siunertaraat, Naalakkersuisut siulittaasuat, Kim Kielsen (S) akissuteqaammini taama allappoq.

Tamanna tunuliaqutigalugu allannguutissatut siunnersuutit qinersisarneq pillugu inatsimmut nutaamut ilanngullugit suliarineqartariaqartut siunnersuutigaa. Tassami inatsit 1998-imi, 2012-mi 2018-milu allanngortinneqarsimasoq misissorneqartariaqalersimasoq, Kim Kielsen isumaqarpoq.

- Qinersisarneq pillugu inatsimmi aalajangersakkat arlallit Naalakkersuisut isumaannik nutarsartariaqalersimapput.

- Tamannalu tunuliaqutaralugu Naalakkersuisut qinersisarneq pillugu inatsisissamik nutaamik suliamik aallartitsipput. Kommunit qinersineq pillugu inatsisissamut kissaataasa piareersaasiornermi sapinngisamik siusinnerpaamik ilanngunneqareersikkumallugit, septembarimi kommunit ataatsimeeqatigineqarput.

Naalakkersuisut inatsit qanoq allanngorusunneraat, tassani oqaatigineqanngilaq.

Pilersaarut malillugu siunnersuut aasaanerani 2020-mi tusarniarneqassaaq.

Bentiaraq Ottosenip (A) siunnersuutaa aqagu Inatsisartuni oqaluuserineqassaaq.