qinersineq
Qinersinissamut oqallinneq annertusarniarlugu aviisit akeqassanngillat
Illoqarfiit tamakkerlugit aviisit Tusagassiivik Sermitsiaq.AG-mit tuniniarneqartartut, AG aamma Sermitsiaq, qinersisoqalernerani akeqassanngillat
Tusagassiivik Sermitsiaq.AG aviisinik marlunnik immikkoortunik saqqummiisarpoq, AG aamma Sermitsiaq illoqarfinni tamani tuniniarneqartarput. Tusagassiivik Sermitsiaq.AG-p aalajangerpaa tulliani saqqummerpata akeqassanngitsut.
AG aamma Sermitsiaq pisiniarfinni 30 koruuneqartaraluarput.
Sermitsiaq.AG-mi pisortap Poul Krarupip aalajangernertik ima nassuiaatigaa:
- Kalaallit Nunaanni tusagassiivittut siuttuusutut pisussaaqataavugut kikkut tamat peqataatinnissaat. Qinersisartut amerlanerulernissaat anguniarlugu taamaasiorpugut.
- Qineqqusaarutigineqartut isumaat saqqummiuttarpavut, aviisillu illoqarfinni tamani tuniniarneqartarlutik. Aamma qineqqusaartut isumaat atuartartut isumaannut ikkunneqartarput. Tassani atuarneqarsinnaasarput qinigassanngortittut ilisimaneqarpallaanngitsut. Aamma qinersisoqangajalernerani aviisit anginerutillugit naqinneqarput, tassani qineqqusaartut amerlanerit aviisini peqataanissaat anguniarneqarluni, Poul Krarup ilisimatitsivoq.
Novembarip 21-ani 26-anilu
Aviisit saqqummertussat tulliit aamma nalinginnaasumit anginerusunngorlugit naqiterneqassapput, illoqarfinnut nassiunneqassallutik, akeqanngitsumillu tuniniarneqassallutik. Danmarkimi aamma sumiiffinni aalajangersimasuni tuniniarneqassapput. Illoqarfiilli tamarmik qinersisoqartinnagu aviisit anngussinnaanavianngillat. Elektronikkillulli aamma aviisit atuarsinnaassavaat.
Aviisit novembarip 21-ani 26-anilu saqqumerpata nittartakkakkut aamma akeqanngitsumik atuarneqarsinnaassapput e-avisinngorlugit. E-avisit nalinginnaasumik 25 koruuneqartaraluarput. Nittartakkakkut www.Sermitsiaq.AG-kkut e-avisinngorlugit saqqummertarput.
Sermitsiaq tallimanngornermi novembarip 21-ani saqqummerpat akeqassanngilaq. AG pingasunngornermi novembarip 26-ani saqqummerpat akeqassanani.
Tusagassiivik Sermitsiaq.AG Kalaallit Nunaanni nittartakkakkut nutaarsiassaqartitsivinni atuarneqarnerpaasartoq www.Sermitsiaq.AG ingerlataraa, kiisalu aamma tuluttuinnaq allaqqasoq The Arctic Journal ingerlataralugu, taanna www.arcticjournal.com-imi atuarneqarsinnaavoq.